Footer

Nagsasaruno nga aksidente, nakagudasan 4 a biag

CANDON CITY – Uppat a biag ti nagudas iti nagsisina nga aksidente a napasamak sadiay Sto. Domingo, Santa, Cabugao ken ditoy siudad manipud Septiembre 15 agingga iti 17.

Natay ni Roman Urban y Ursua, 27, residente iti Barangay San Vicente, Magsingal; Rommel Laureta y Tumalet, 28, residente iti Poblacion East, Pidigan, Abra; Rolando Gallardo Marques, 36, residente iti Pascual Village, Roxas, Isabela; ken Gen Lawrence Ramos y Estabillo, 22, residente iti Barangay Parioc 1st, Candon City gapu iti pannakainbolbarda iti aksidente manipud kadagiti nadakamat a petsa.

Iti immuna nga aksidente a napasamak iti Barangay Pangpangdan, Sto. Domingo, Ilocos Sur idi agarup 11:05 ti rabii ti Septiembre 15, nainbolbar ditoy ti Honda motorcycle a minaneho ni Roman Urban y Ursua, 27, ken ti Yamaha Mio Sporty a minaneho ni Jomar Uberita y Hayag, 27, ken residente iti Barangay Sived, Sto. Domingo.

Mapapati a kimmaut ti Yamaha Mio iti linia ti Honda a puon ti nagdinnungparanda ken nagsagrapan dagiti dua a drayber ken ti back rider kadagiti sugat iti nadumaduma a paset ti bagida.

Naitaray dagiti biktima iti Northside Doctor’s Hospital, Guimod, Bantay, Ilocos Sur ngem naideklarar a dead on arrival ni Urban.

Iti maikadua nga aksidente a napasamak idi agarup 10:20 ti rabii ti Septiembre 16, mapapati a napukaw ni Laureta, maysa a trabahador, ti kontrolna iti manibela a a puon ti naggibaran ti lugan iti akinlaud nga abaga ti kalsada ken nakadungparanna iti poste ti elektrisidad.

Gapu iti napigsa nga impact, nagsagrap ni Laureta kadagiti nakaro a dunor iti ulona ket nupay naitaray iti Ilocos Sur Provincial Hospital, naideklarar nga awanen ti biagna.

Ti dunorna iti ulo ken nadumaduma a paset ti bagina ti naitudo a puon ti nakatayan ni Rolando Gallardo Marques, 36, ken residente iti Pascual Village, Roxas, Isabela idi naaksidente idi parbangon ti Septiembre 16 iti national highway a sakup ti Barangay Rizal, Cabugao, Ilocos Sur.

Segun iti maysa a guardia ti Pira Clinic and Hospital, nakitana a timmaliaw ni Gallardo iti likudanna bayat ti panagtaray ti KTM Duke a motorsiklona ket daytoy ti mapapati a nakagapu iti pannakapukaw ti kontrolna iti manibela a nakaigapuan ti pannakadungparna iti kongkreto nga alad ti Multi Pure Purified Water Refilling Station.

Naitaray ni Gallardo iti Pira Clinic and Hospital ngem awanen ti biagna idi maidanon iti balay-paggagasan.

Kabayatanna, nupay adda nga aruatna a helmet idi naaksidente, mapapati a grabe unay dagiti sugat ni Gen Lawrency Ramos y Estabillo ket saanen a naidanon a sibibiag iti St. Martin De Porres Hospital..

Segun iti maysa a Nelmar Garabiles, 31, awanan asawa, ken residente iti Barangay Paypayad, bayat ti panagdaliasatna iti Darapidap Road, nakitana babaen ti side mirror ti luganna a dinungpar ti biktima ti flower box iti pagkurbaan a paset ti kalsada.#

Comments are closed.