Footer

EDITORIAL: Madusanto ngata dagiti polis a pimmatay ken ni Kian Loyd De Los Santos?

MADUSANTO ngata dagiti polis nga adda pakainaiganna iti pannakapapatay ti barito a ni Kian Loyd De Los Santos bayat ti Anti-Illegal Drugs Operations, wenno maibilangto laeng ti kaso kadagiti rinibun a pammapatay iti gerra kontra illegal a droga?

Naglak-am ti nabara a kritisismo ni Presidente Rodrigo Duterte ken ti Philippine National Police iti pannakapapatay ni Kian, agtawen iti 17, ken Grade 11 student kabayatan ti Oplan Galugad nga inwayat dagiti polis sadiay Santa Quiteria, Baesa, Caloocan City a pagnanaedan ti pamilia ti barito.

Inakusaran dagiti polis a courier ni Kian, ken pusher met ti droga ti amana, ken limmaban ti barito bayat ti panangaresto dagiti polis kenkuana. Naglibakan ti ama ken pamilia ni Kian nga adda pakainaiganda iti droga, ken limmaban ti barito kadagiti polis idi arestarenda. Naalaan iti CCTV camera ti panangulod dagiti polis ken ni Kian sakbay ti pannakapapatayna.

Natakuatan iti autopsy nga insayangkat ti forensic expert iti Public Attorney’s Office a ti bangkay ni Kian ket nagsagrap ti tallo a sugat wenno gunshot wound iti likudan ken ulona a maibilang a naigagara wenno treacherous wounds a mangipaneknek a napapatay ti barito nga awanan-gaway.

Ti resulta ti autopsia ti bangkay ni Kian ket kasupadi ti depensa dagiti polis nga immuna a pimmaltog ni Kian, ken sinungbatanda laeng ti panangpaltog kadakuada ti barito iti Kalibre .45 a narekobre iti abay ti bangkayna. Dagiti tallo a polis a nainaig iti operasion ket da PO1 Jeremias Pereda, PO1 Jerwin Cruz ken PO3 Arnel Oares. Narelibuandan iti destino dagiti tallo a polis, agraman ti precinct commander a ni Chief Inspector Amor Cerillo, ken ti Caloocan City Police Chief Senior Superindent Chito Bersaluna.

Impatalgeden ni PAO chief Persida Rueda-Acosta a tumulong ti ahensiada iti pamilia ni Kian a mangipila ti murder kontra kadagiti polis a nangpaltog ken pimmatay iti barito. Indiaya metten ti Department of Justice ti panangtulongda iti pamilia ni Kian kagiddan ti panangiwayat ti National Bureau of Investigation iti bukodda nga imbestigasion.

Naglak-am ti nabara a pammabalaw ti administrasion iti pannakapapatay ni Kian a nairana kadagiti nagsasaruno a pammapatay iti maibilang a kadaraan a lawas iti kampania kontra droga ta iti nagsasaruno nga aldaw ket nasurok a 85 dagiti napapatay iti operasion dagiti polis. Agdagup iti 32 dagiti napapatay iti nagpatnag sadiay Bulacan, ken 25 iti nagpatnag sadiay Manila, sabali pay dagiti kabangibangna a lugar.

Inrugin ti Senate Committee on Public Order and Dangerous Drugs iti panangidaulo ni Senador Panfilo Lacson nga imbestigaren ti kaso ni Kian ken pammapatay iti gerra kontra droga. Sangapulo ket uppat a senador a kameng ti 17 a majority block, ken innem a miembro ti minority dagiti nagpirma iti resolusion para ti imbestigasion a nakaimbitaran nga agpalawag da PNP Chief Dir. Gen. Ronald dela Rosa, ken dagiti maseknan a polis ken kangrunaan a testigo iti pammapatay.

Impatalgeden ni Duterte a saanna a dependeran dagiti polis no matakuatan a nagbasolda. No man pay sakbayna ket impeksana ti ragsakna iti kaadu dagiti napapatay dagiti polis iti Bulacan iti gerra kontra illegal a droga, ken pinadayawanna dagiti pannakabagi ti linteg iti pingetda.

Adu nga umili dagiti agdudua no magun-odto ti hustisia ti pannakapapatay ni Kian. Agamakda amangan no maipadanto laeng ti kaso dagiti polis a pimmatay ken ni Kian, iti napasamak kada Supt. Marvin Marcos ken kakaduana a nainaig iti pannakapapatay ni sigud nga Albuera, Leyte Mayor Rolando Espinosa, ken ti kaso da Chief Insp. Jovie Espenido ken kakaduana a responsible iti pannakapapatay ni Ozamiz City Reynaldo Parojinog ken dagiti kapamilia ken kakaduana. Agpada dagiti dua a napapatay a mayor a karaman iti narcolist ti Presidente.

Gapu iti napasamak ken ni Kian, immadun dagiti nalatak a personalidad, lider ti oposision ken obispo iti Simbaan Katolika dagiti immalma iti agtultuloy a nadara a kampania kontra illegal a droga a pakairamramanan dagiti inosente a tattao. Supsuportaran ti Simbaan ti kampania iti pannakapaksiat ti illegal a droga, ngem kontraenda dagiti nagadun a pammapatay a saan a naikkan ti hustisia.

Kiniddaw ni Catholic Bishops’ Conference of the Philippines President Lingayen-Dagupan Archbishop Socrates Villegas ti pannakapatit dagiti kampana iti arkidiosisna iti lima a minutos iti alas-otso iti rabii kas panangipakitada iti panangkondenarda kadagiti adun a pammapatay iti gerra kontra illegal a droga.

Makaalarman dagiti agtultuloy a saan a masolsolbar a pammapatay ken ti pannakaaramat ti kampania kontra illegal a droga a rason kadagitoy a pammapatay. Segun iti record ti PNP, agarupen a 3,500 dagiti napapatay manipud idi Hulio 1, 2016 iti kampania iti illegal a droga, ken agarup 2,000 kadagitoy dagiti lehitimo nga operasion. Ngem maibasar iti estatistika manipud iti media ken non-government organization a naipadanon iti Commission on Human Rights, agarupen a 12,000 dagiti napapatay iti agdama a gerra kontra illegal a droga.

Inkari idi panawen ti kampania ni Duterte a solbarenna ti problema ti illegal a droga iti tallo agingga iti innem a bulan. Ngem kalpasan ti makatawen a panagtakemna, inrakurakna a saanna a marisut ti problema agingga a malpas ti terminona. Agpatingga kadi lattan a karaman iti collateral damage ni Kian ken dadduma pay a pammapatay iti gerra kontra droga?

Dakes ti epekto ti illegal a droga ket nasken a mapasardengen ti panagrairana, ngem saan koma a kas ti karanggas ken kadara ti sistema a pannakapapatay dagiti suspek ta kaaduanna a biktima ket dagiti napanglaw ken awanan-gaway, kabayatan a dagiti nabileg ken babaknang ket malisianda ti ngipen ti hustisia. (Eden A. Alviar)

Comments are closed.