Footer

EDITORIAL: Pannakaisubli iti Gobierno dagiti Nakusit a Kinabaknang

PUDNO ngata ti tarigagay ti pamilia daydi Presidente Ferdinand Marcos nga isublin ti paset dagiti kinabaknangda a maatap a nagun-odda iti dakes a wagas kabayatan ti napaut a panawen a panagturayna?

Inrakurak ni Presidente Rodrigo Duterte a nakipatang kenkuana ti pannakangiwat ti Pamilia Marcos ta kayatda nga isubli ti paset ti mapapati nga ill-gotten wealth iti gobierno tapno mainayon iti mausar a pondo ti pagilian. Impalgakna a kasapulanna ti autorisasion manipud iti Kongreso tapno adda bilegna a makitulag kadagiti Pamilia Marcos iti pannakaisubli ti paset ti kinabaknang ti pamiliada.

Saan a kinompirma wenno naglibakan ni Ilocos Norte Governor Imee Marcos ti inrakurak ti Presidente iti publiko ngem impasingkedna nga ania man a negosasion ket makaammon dagiti abogado ti pamiliada ken ti Presidente wenno pannakabagina.

Narigat a patien ni House Speaker Pantaleon Alvarez iti kinaserioso ti Pamilia Marcos a mangisubli ti paset ti maatap a kinusitan a kinabaknangda. Agdudua pay no addaan ti Kongreso iti bileg a mangited ti autoridad iti Presidente a makinegosasion kadagiti kameng ti Pamilia Marcos.

Impalgak met ni Albay Representative ken lider ti opposition bloc Edcel Lagman a saanen a kasapulan ni Duterte ti autorisasion ti Kongreso tapno makinegosasion iti pannakaisubli ti maatap a kinusitan a kinabaknang ti Pamilia Marcos ta addan kenkuana dayta a bileg babaen ti Presidential Commission on Good Government. Ti PCGG ket nabukel tapno pasublienna dagiti mapapati a kinusitan a kinabaknang a naurnong ti Pamilia Marcos, dagiti kabagian, pasurot, nasinged a kaaliadoda iti Pilipinas ken sadiay ballasiw ti taaw.

Ti inrakurak ni Duterte a tarigagay ti Pamilia Marcos a mangisubli ti paset ti maatap a kinusitan a kinabaknangda agraman dagiti sumagmamano a gold bars ket nagpataud iti nagduduma a reaksion kadagiti Pilipino. Adda dagiti nagkuna a saan a nakapappapati nga aramiden dayta ti Pamilia Marcos ta iti nabayagen a tiempo ket saanda nga inaklon a nagpabaknangda wenno nagkusitda kabayatan ti panagtakem daydi Presidente Marcos iti 20 a tawen kas pangulo ti Pilipinas.

Nabayagen a kamkamaten ti gobierno ti Pilipinas babaen ti Presidential Commission on Good Government a pasublien dagiti mapapati a kinabaknang a nagun-od ti Pamilia Marcos kabayatan ti panagturayna. Addan payen bilin ti Korte sadiay Estados Unidos nga isublida dagita a kinabaknang ken maibingayan dagiti biktima iti panagabuso iti kalintegan ti tao kabayatan ti Martial Law. Ngem saan nga aklonen ti Pamilia Marcos a nagpabaknang wenno nagkusitda.

No mangisubli ti Pamilia Marcos iti paset ti maatap a kinusitan a kinabaknangda ket saan kadi a panangaklon dayta iti panagaramidda iti maikanniwas iti linteg babaen ti kurapsion ken panangabusoda iti turay? Apay koma a mangisublida iti paset ti kinabaknangda no awan ti innalada a kukua ti gobierno wenno dagiti umili?

Agingga iti agdama ket saan a masinunuo ti kaadu ti kinabaknang a naurnong ti Pamilia Marcos kabayatan ti 20 a tawen a panagturay ti pimmusayen a sigud a Presidente. Nabayagen nga ibagbaga ni sigud a First Lady ken agdama nga Ilocos Norte Representative Imelda Marcos a dagiti kinabaknang ti pamiliada ket saan a nakusit iti kaadda iti turay ti asawana ngem sakbay a nag-presidente ket baknangen ti asawana.

Nagbalinen a nabara a kontrobersia iti naglabas a panawen nangruna idi sakbay a napadisi iti turay daydi Marcos dagiti alegasion ti kurapsion ken kickbacks kadagiti kontrata iti gobierno, ngem saan a naan-anay a napaneknekan dagita a pammabasol.

Nairakrakuraken iti naglabas a nagtaud ti kinabaknang ti Pamilia Marcos kas nakali a paset ti Yamashita Treasure a nakaalaan kadagiti tinoleda a gold bars, golden Buddha ken napapateg nga alahas a naikali kadagiti nadumaduma a paset iti Pilipinas iti paggibusan ti Maikadua a Gubat iti lubong nga iti dayta a panawen ket maysa a major a soldado ti sigud a Presidente.

Manipud pay idi nabukel ti PCGG kalpasan ti pannakapadisi daydi Presidente Marcos ket inkagumaanda a tuntonen ken pasublien dagiti binilbillion ti balorna a kinabaknang ti Pamilia Marcos ken dagiti crony ti sigud a Presidente. Nakapasublidan iti nasurok a P170 billion ti balorna a kinabaknang pakairamanan dagiti deposito iti banko iti Switzerland, shares kadagiti stocks iti nagduduma a kompania, real estates iti Pilipinas ken ballasiw-taaw, paintings, alahas ken dadduma pay a napateg a kinabaknang. Ngem bassit unay dayta a kantidad no maidilig iti mapapati a kadakkel ti naurnong a maatap a kinusitan a kinabaknang ti Pamilia Marcos.

Nabayagen a kamkamaten ti PCGG dagiti mapapati a kinusitan a kinabaknang ti Pamilia Marcos, ngem agingga iti agdama a panawen ket napaayda a nakapasubli iti naindaklan ti balorna a kinabaknang. Nasayaat unay no aklonen ti Pamilia Marcos ti nagtaudan dagiti kinabaknangda ket isublidan iti gobierno ti saanda a kukua ta agkasapulan unay ti gobierno ti usaren a pondo.

Ngem no mangisubli ti Pamilia Marcos, nasken nga itedda amin dagiti innalada a saanda a kukua, ken awan ti nalimed a kondision.

Nasken nga agbalin a nalawag ti negosasion ken saan a mailimed kadagiti umili no mano ti kantidad a maisubli iti gobierno. Masapul pay a masaluadan dagiti maisubli a kinabaknang tapno mausar para ti sapasap a pagimbagan ti pagilian, amangan no kusiten laeng manen dagiti dadduma nga opisial ti gobierno. (Eden A. Alviar)

Comments are closed.