Footer

EDITORIAL: Smuggling ken Kurapsion iti Bureau of Customs

SINO kada Senador Panfilo Lacson ken sigud a Bureau of Customs Commissioner Nicanor Faeldon ti agsasao ti pudno ken ulbod iti panangakusarda iti tunggal maysa? Ania ti pagturongan ken pagalimpatokan ti riri ti senador ken ti dati a mangidaulo ti BOC? Apay a nagdaras metten a bimmaaw ti isyu gapu kadagiti kabarbaro a kontrobersia?

Dagitoy ti nagkaykaysa a saludsod dagiti adu nga umili kalpasan ti nabara a riri ken sinnungbat iti media da Lacson ken Faeldon ta dakkel daytoy ti epektona iti panagbiag dagiti Pilipino nangruna iti pannakapaksiat ti panagraira ti kurapsion ken illegal a droga.

Pinabasol ni Lacson ni Faeldon iti privilege speech-na sadiay Senado nga umaw-awat ti sigud a BOC Commissioner iti minilion a payola wenno tara manipud kadagiti customs players tapno mapadaras ti pannakairuar dagiti kargamentonda. Inrakurakna a katugtugaw pay laeng idi ni Faeldon iti BOC ket napasarabuanen iti P100 million a payola. Inrakurakna nga imbes a lininteg ni Faeldon ti bulok a sistema ket intandudona ketdi ti kurapsion iti BOC.

Impalgak ni Lacson dagiti lima a deputy commissioners, opisial iti BOC ken dagiti agpapaay iti Manila International Containers Port – Port of Manila, ken dadduma pay a puerto nga umaw-awat iti payola. Mairaman kadakuada dagiti sigud a kakadua ni Faeldon iti Magdalo Group a nakipaset iti Oakwood mutiny, ken dagiti nasinged kenkuana a sigud nga opisial iti militar. Imbutaktak ni Lacson ti proseso ti “Tara system” a pannakakolekta ti payola wenno tara a P19,000 – P45,000 kada container tapno mapadaras ti pannakairuar dagiti kargamento nga it-ited dagiti broker ken fixer. Innagananna dagiti 44 customs players nga agpaspasuksok tapno makairuarda kadagiti adu a containers iti inaldaw. Impalgak ni Lacson a ti P6.4 billion ti gatadna a shabu a naiserrek iti BOC ken naipan iti bodega sadiay Valenzuela City ket nakalusot gapu ti pannakikumplot dagiti opisial iti BOC. Dayta a kontrabando manipud China ken nagna iti green wenno express lane ket saanen a nainget a nasukimat uray no adda pagannurotan nga amin a kargamento manipud China ken shipment dagiti nabiit pay nga importer ket nasken a nainget a mainspeksion.

Naglikudan ni Faeldon dagiti akusasion kenkuana ni Lacson. Pinabasolna met ti anak ti senador a ni Panfilo Lacson Jr. a kangrunaan nga smuggler ti semento iti pagilian, ken nakakusitan iti riniwriw nga ingreso ti gobierno. Inrakurakna a dagiti kargamento ti Bonjourno Trading nga imatonan ni Lacson Jr. ket nababbaba nga amang wenno undervalued ti baybayadanda a freight iti gobierno iti $8 kada metrika tonelada, imbes a $16 – $20 ti kada metrika tonelada.

Inrakurak ni Faeldon nga iti uneg ti tallo nga aldaw ket tallo met a barko dagiti inserrek ti Bonjourno Trading nga aggatad iti P106 million, ken nakasukalda iti billion ti balorna a 67 shipments a naismagel a semento babaen ti kompania nga adda laeng iti paid-up capital a P20,000. Inakusaranna ni Lacson Jr. a napan nangipan ti pasuksokna iti maysa nga staff iti BOC.

Impalgak ni Faeldon a dayta ti gapu a kayat ti senador a maikkat isuna ken dagiti kakaduana iti BOC gapu iti iwaywayatda nga imbestigasion iti pannakaismagel dagiti semento, ken dandanidan matuntonan dagiti adda pakainaiganna. Sinaludsod pay ni Faeldon no ti senador ket dummy ti anakna iti negosio. Inakusaranna pay ti senador nga agpaspasikat laeng kas panagsagsaganana iti panagkandidatona iti sumaruno a presidential election.

Naglikudan ni Lacson dagiti alegasion ni Faeldon kadakuada nga agama. Inrakurakna nga awan ti arapaapna nga agkandidato iti nangatngato a posision. Impalgakna a no pudno dagiti pammabasol ni Faeldon ket idi pay koma a nagdarum a saan laeng nga itan ta naibutaktaken dagiti dakes nga aramidna, ken nasukatanen a BOC Commissioner.

Nabayagen a mabigbig ti BOC nga apon ti kurapsion ken kangrunaan a pakaiserserrekan dagiti ismagel a produkto babaen ti technical smuggling iti pannakikumplot dagiti opisial ken agserserbi iti ahensia. Ngem naidumduma itan ta saan laengen a kadawyan a produkto dagiti maiserserrek iti BOC ngem uray payen ti illegal a droga. Isu met laengen nga uray kasano ti kapinget ti gobierno a mangpaksiat ti panagraira ti illegal a droga, ken uray rinibun a biag dagiti nakettel itoy a kampania ket saan a mapakpaksiat ti problema ta mismo a dagiti opisial ken agserserbi iti BOC ket kakumplot dagiti sindikato ti droga.

Nakasursuron dagiti mapaspasamak a kurapsion iti BOC a naggapuan ni Faeldon, agingga a sinuktanen ni Isidro Lapeña, sigud a director general ti Philippine Drug Enforcement Agency. Napilitan ni Presidente Rodrigo Duterte a sinukatan ni Faeldon gapu ti kiddaw dagiti adu a kongresista ken senador gapu kadagiti kontrobersia a dagramut iti P6.4 billion illegal Drugs a naipuslit iti BOC.

Uray no nasukatanen ni Faeldon iti BOC, kasapulan a maituloy latta ti imbestigasion ti pannakaipuslit ti illegal a droga. No matakuatan nga adda pakainaigan wenno nagliwayanna ken dagiti kakaduana ket rumbeng nga agsungbatda iti linteg. Masapul met a nainget a maimbestigaran dagiti alegasion kontra kadagiti agama a Lacson. No agpayso nga agis-ismagel iti adu a produkto ti kompania ni Lacson Jr. ket adu a gatad ti buis ti kuskusiten ti kompaniana. No adda pakainaigan ti senador iti negosio ti anakna ket rumbeng laeng a maidarum ken madusa met ta awan ti sino man a nangatngato ngem ti linteg. (Eden A.)

Comments are closed.