Footer

PARTAAN

Sarita ni Salvador A. Espejo

SAGGATLON a botelia ti serbesa ti nagawanganmi ken Kompadre Mario. Kasusueldomi ket nagtulaganmi nga agpapudotkami bassit sakbay nga agawidkami. Isu ti sekretario ti branch manager ti Luzon Insurance Company. Agpapaayak met a Junior Executive iti Northern Marketing Corporation.

Kompadre, mamatika kadi iti partaan?” kinunak.

Linoloko dayta, Kompadre,” insungbatna.

Uray siak, diak mamati idi damo. Ngem patiem ngata no ibagak nga insalakannak ti partaan?”

Ni kompadre, ti la maibagbagana. Wenno simmamayen kenka ti ininumta?”

Pudno a napasamak kaniak daytoy, Kompadre.”

Adda panagduadua iti rupana. Uray siak, no saan a napasamak kaniak, diak koma patien.

NANGRUGI ti amin iti maysa a rabii…

Nabaringkuasak iti kellaat a panagikkis ni Luisa. Ginunggonko ngem nagikkis latta. Tinungpak. Nagmulagat ket immarakup. Agkinkintayeg a kasla mabuteng.

Apay?” sinaludsodko. Linuktak ti silaw ti siledmi. Ginaw-atko ti sangabaso a danum a nakaluban iti lamisaan iti abay ti katre ket pinainumko.

Nagdakesen a tagtagainep!” kinunana.

Apay, ania kadi ti natagtagainepmo?”

Dinungpar kan’ ti bagon ti kotsem.”

Isu met la a kasta unay ti ikkismo.”

Tallokayo a naglugan. Duakayo a lalaki iti sango, maysa a babai iti likud. Napintas ti babai. Remy kan’ ti naganna. Sumangsang-at ti kotsem iti ngatuen ti Sablan. Pagam-ammuan, iti pagkurbaan, adda kasinnabatyo a bagon. Napegges ti panagtarayna. Inawidmo nga impaigid ti kotse ngem kimmaut ti bagon iti liniam. Iti pigsa ti panagdinnungpar ti luganyo, nabaliktad ti kotsem ket nagtulidtulid iti derraas.”

Namrayak ti nagkatawa. Kinusok ti buokna. “Dayta la gayam, urayka la nagkalkalimduosanen. Baliktad ti tagtagainep.”

Maysa la ketdi a partaan daytoy, Daddy. Numona ket sumang-atka idiay Baguio ita a bigat.”

Kinitak ti relo iti uluananmi. Alas kuatron iti parbangon. Agsisinnungbaten ti taraok dagiti manok.

Bumangonta ngaruden,” kinunak. “Masapakami nga agrubuat ken ni Kompadre Tony.”

S-saankan sa la nga agtuloyen, Daddy.”

Amin la a patpatiem. Saankan sa ngamin nga agdigdigos ‘su a ti la matagtagainepmo,” inyangawko.

Dinak man ang-angawen.”

Ania ngarud ti aramidek? No saanak nga agparang iti komperensiami no malem, anianto ti masao ti pangulo ti departamentomi?”

Naimas ti panamigatko. Ngem timtimtiman ni Luisa ti sangsanguenna.

Ania ketdin ni Mommy ta dina man la maipangpanganen ti natagtagainepna,” kinunak.

Agparparikna kaniak a saan a makaay ni Kompadre.”

Dimo kunaen nga agkurri manen ti maikanem a sentidom,” inyangawko.

Dimo ang-angawen dayta a banag. Adu ti datdatlag a pasamak ditoy lubong a di kabaelan nga ilawlawag ti siensia.”

Ala, wen, mamatiakon. Bay-am ta no adda masabatmi a bagon ken Kompadre, isardengko nga ipaigid ti kotsek.”

Impalunipinna dagiti lupotko iti bassit a maleta. Kinitak no adda met la amin dagiti nasken a papeles nga ikuyogko.

Alas sais idi rimmuarak iti balay. Inagkak ni baket idinto nga inyunay-unayko a saan nga agbutbuteng ta dobliek pay ti annadko nga agmaneho.

Agsagsagawisiwak a limmugan iti kotsek kalpasan a kinermak ni baket nga agtaktakder iti ridaw. Nagpayapay met.

Iti Barangay 8 ti yan ti pagnaedan ni Kompadre Tony. Ammok nga agur-uray itan ta nagtulaganmi a sakbay ti alas siete ti panangdaw-asko kenkuana.

Insardengko ti kotse iti batog ti balay da Kompadre Tony. Nagbosinaak iti namitlo. Ti babaonenda ti nangilukat iti ruangan.

Awan ni Manong Tony, sir,” kinunana. “Adda iti ospital.”

Ospital? Apay?”

Kua, inagal ni Manang ti sakit ti tianna. Nabtak sa ti apendisitisna.”

Napanak iti ospital. Iti ruar ti operating room, saan a makatalna ni Kompadre Tony.

Kellaat ngarud ti napasamak, Kompadre,” inlawlawagna. “Ur-urayenka itay agilus lattan ni Komadrem iti sakit ti tianna. Bimtak nga apendisitis, kuna ni Dr. Lazo.”

Kinuna ni Kompadre Tony a saanen nga agtuloy ta bantayanna ni baketna.

Nalagipko ti nagpartaan ken ni Luisa. Nairanrana ngata laeng ti nagparikna kenkuana a saan a makaay ni Kompadre Tony?

(Maigibusto)

Comments are closed.