Footer

TI PANNAKATAY NI OSAMA BIN LADEN

Salaysay ni Eden A. Alviar

KAASPINGEN ti pannakalagip dagiti tattao iti sangalubongan ti napasamak a trahedia idi Septiembre 11, 2001 sadiay United States of America a nakatayan dagiti agtallo ribu a tattao a gapuanan dagiti Arabo a terorista a kameng ti Al Qaeda, ti pannakalagipda ti lider dayta a grupo a nagplano ken nangmandar kadagiti adu a terorismo.

Narigat a maitanem iti lagip dagiti tattao a makaammo ken marikna iti buteng iti terorismo, ti kabibiag ni Bin Laden a maysa nga Arabo ken nagtaud iti nabaknang a pamilia dagiti negosiante sadiay Saudi Arabia, ngem pinilina ti nangibiag ti naballikog a pammatina iti Islam, ken nangiwayat kadagiti gannuat a nangisaknap ti terorismo, agingga iti ipapatayna.

Kalpasan ti 9/11 Attacks a namagbaliw iti wagas ti seguridad ken pannakilangen ti US kadagiti dadduma nga Arabo a pagilian, nayusuat ti Global War on Terrorism nga inwayat ti nagsaruno nga administrasion da Presidente George Bush ken Barack Obama. Nagbalin ni Bin Laden a Most Wanted a terorista iti US ken iti lubong, ken nangidiaya ti US $25 Million ti Federal Bureau of Investigation a gunggona iti pannakatiliw wenno ipapatayna. Rinautda ti Afghanistan ken pinaksiatda dagiti Taliban a napapati a naglemmengan ni Bin Laden, ngem napaayda iti panggepda.

Riniwriw a dollar ti ginastos ti US Government agingga a napapatay dagiti operatiba nga indauluan ti Central Intelligence Agency Special Activities Division ken US Joint Special Operations Command nga indauluan ti Commander-da a ni Vice Admiral William McRaven, ni Bin Laden iti safe house-na sadiay Bilal, Abbotabad, Pakistan ken naitabon iti bangkayna iti North Arabian Sea idi Mayo 2011.

Maibasar kadagiti de-classified reports, napapatay ni Bin Laden iti tawenna a 54 kabayatan ti nalimed nga Operation Neptune Spear idi pasado ala-una iti parbangon ti Mayo 2, 2011 babaen kadagiti nagtipon a puersa ti CIA, JSOC, US Navy SEAL Team Six, US Naval Special Warfare Development Group, 160th Special Operations Aviation Regiment (Airborne), ken Marine Tactical Electronic Warfare Squadron 4. Nayusuat ti panagraut iti safe house ni Bin Laden sadiay Abbottabad, Pakistan, manipud iti Jalalabad, Afghanistan.

Naglugan dagiti 24 nga operatiba kadagiti dua a Black Hawk “Stealth” helicopters, a saan a nadlaw iti radar dagiti Pakistani Air Force gapu ta naulimek ti andar dagiti choppers ken nababa ti tayabda. Kabayatan a nakasagana iti asideg a desierto dagiti dadduma a tropa a nailugan iti Chinook helicopters a sumaranay iti assault team.

Napapatay pay iti operasion dagiti uppat a kabbalay ni Bin Laden iti safe house ti anakna a ni Khalid bin Laden, 23; ti taltalkenna a courier a ni Abu Ahmed al-Kuwaiti, 33 ken kabsatna a ni Abrar Ahmed al-Kuwaiti, 30, ken nanaganan a Bushra, babai a saan a masinuno ti tawenna nga asawa ni Abrar.

Awan ti natay wenno nakaro a nasugatan kadagiti US Forces a nangisayangkat iti raid, uray na-crashed ti maysa kadagiti dua a helicopter a nangitulod kadakuada iti uneg ti compound kabayatan ti panagpababana gapu iti vortex ring state a pinataud ti napigsa nga angin.

Naileppas ti assault iti compound iti las-ud ti 38 a minutos, nabibiit ngem ti sinanayda a 40 a minutos a leppasenda ti kapeggadan a paset ti mision. Nadaras a nakapanaw dagiti US Forces nga awitda ti bangkay ni Bin Laden ken nagluganda iti Black Hawk helicopter ken Chinook chopper, kalpasan a pinabettakda ti na-crash chopper tapno mailemmeng dagiti classified equipmetns ken saan a makopia ti moderno a diseniona.

Inaklon iti publiko ni Navy SEAL Operative Robert O’ Neill nga isuna ti nakapaltog ken Bin Laden iti uneg ti siledna iti maikatlo a kadsaaran ti safe house. Inrakurakna nga idi nagtulatid a simrek iti siled ket nadanonna a nakatakder ni Bin Laden iti likudan ti maysa a babai a nakapatay ti imana iti abagana idi pinaltoganna a namindua iti mugingna, ken naminsan pay a pinutokanna idi nalusdoyen tapno makasiguro a natayen. Simrek met ti Navy SEAL Operative Matt Bissonnette a pinaltopaltoganna met ti bagi ni Bin Laden idi napasagen.

In-radio ti The SEAL team leader “For God and country – Geronimo, Geronimo, Geronimo.” Kinompirmana ken ni Admiral McRaven a “Geronimo E.K.I.A.” (Enemy Killed In Action. Kagiddan dayta ti panangbuya iti White House ni Presidente Barack Obama ken dagiti nangato nga opisial ti US iti pannakaisayangkat ti Operation Neptune Spear.

Naibati dagiti uppat a bangkay ken dagiti sibibiag a babbai ken ubbing a nakaposas ken nakagalut iti ruar ti compound, ket nagluganen dagiti US operatives iti Black Hawk ken Chinook Helicopters a nagsubli sadiay Bagram Airfield. Naitayab ti bangkay ni Bin Laden manipud Bagram agingga iti aircraft carrier USS Carl Vinson babaen ti V-22 Osprey Tiltrotor aircraft a binayabay dagiti dua a US Navy F/A-18 fighter jets. Naitabon ni Bin Laden iti baybay gapu ta awan ti pagilian a nayat a nangawat ti bangkayna. Immuna nga immawag ti US iti Saudi Government a nangaprobar ti pannakaitabon ti bangkayna iti taaw kalpasan ti pannakaiwayat ti Muslim rites iti uneg ti USS Carl Vinson sadiay North Arabian Sea iti las-ud ti 24 nga oras nga ipapatayna.

Nagpatingga iti pannakapapatay ni Osama kalpasan ti agsangapulo a tawen a pananganup kenkuana dagiti operatiba ti US Government. Naaddaan ti lead idi 2002 dagiti CIA operatives iti panangtuntonda ken ni Bin Ladin iti pannakaammoda a manipud idi 1998 a naatake iti missile dagiti kuta ni Bin Laden sadiay Afghanistan gapu iti pannakatuntonna gapu ti panagusarna it satellite phone, ket saanen a nagus-usar iti telepono wenno electronic gadget iti pannaki-komunikasionna kadagiti pasurotna iti Al Qaeda, ngem babaen ti matalekna a courier wenno mensahero. In-inut a nakompirmaran ti courier kabayatan ti interogasion dagiti natiliw a kameng ti Al Qaeda a nakabalud iti US Detention Camp sadiay Guantanamo Bay, Cuba a nakabaludan dagiti natiliw a terorista.

Naireport nga idi 2010, maysa a Pakistani Intelligence Officer ti napan iti US Embassy Station Chief sadiay Islamabad ken indiayana ti panangirakurakna iti ayan ni Bin laden kasukat ti $25 million a gunggona. Kalpasan ti nakapasa ti opisial iti polygraph test, inrugin ti US ti surveillance kadagiti mapati a pagnaedan ni Bin Laden.

Babaen ti pannaka-wiretap ti masuspetsa a courier, dagiti CIA operatives ket natakuatanda idi Agosto 2010 ti ayanna ken sinurotda aginga iti Abbottabad compound a nagatapanda a sadiay ti paglemlemmengan ni Bin Laden.

Nagbasar dagiti CIA operatives kadagiti surveillance photos ken intelligence reports tapno maamuanda dagiti agnaed iti Abbottabad compound a nagturongan ti courier. Idi Septiembre 2010, nakompirmaran a ti compound ket nabangon a naisangrat a mangilemmeng ti naidumduma a tao a kas ken Bin Laden.

Nabangon ti tallo-kadsaaran a pasdek iti compound idi 2004 iti pagpatinggaan ti akikid ken natapok a kalsada. Naisaad daytoy iti uppat a kilometro ti kaadayona manipud iti sentro ti Abbottabad.

Ti Abbottabad ket agarup 160 kilometro ti kaadayona iti beddeng ti Afghanistan ita Daya a suli ti Pakistan. Agarup 1.3 a kilometro laeng ti kaadayona iti Pakistan Military Academy. Naisaad daytoy iti lote a mamin-walo a nalawlawa ngem dagiti karrubana. Nalikmut ti compound iti 12 – 18 a kadapan ti kangatona a konkreto a pader a naparabawan iti siitan a barut. Addaan iti dua a security gates, ken ti balkonahe ti maikatlo a kadsaaran ti pasdek ket addaan iti pribado a pader a pito a kadapan ti kangatona a nairanta tapno saan a makita ti natayag a tao kas ken ni Bin Laden a 6 feet 4 inches ti katayagna.

Ti compound ket awanan ti internet wenno landline telephone connections. Dagiti agindeg ket puoranda dagiti basurada, a saan kas kadagiti karrubada nga iruarda tapno makolekta. Saan met a makitkita dagiti agnaed iti compound dagiti karrubada.

Indauluan ti CIA ti surveillance ti compound, timmulong met iti operasion dagiti dadduma pay nga ahensia ti US pakairamanan ti National Security Agency, National Geospatial-Intelligence Agency, Office of the Director of National Intelligence, ken Defense Department. Dakkel a kantidad ti nausar iti intelligence gathering ta dagiti opisial ti CIA ket nagkiddawda idi 2010 ti autoridad a mangiyalokar ti pinupullo a million a dollar tapno mapunduan ti operasionda.

Nakapatpateg ti Operation Neptune Spear ta mismo a personal a binayabay ni Presidente Obama ti pannakaimplementarna agingga a napapatay dagiti operatiba ti US Government ni Bin Laden a pundador ken lider dagiti terorista nga Al Qaeda.

Adu man a pondo ti binusbos ti US Government iti pananganupda ken ni Bin Laden, saan a nasayang ta nagibusanen ti dakes nga aramid ti lider ti Al Qaeda idi 2011. Ngem kalpasan laeng ti dua a tawen, idi 2013, naglatak ti grupo nga Islamic State of Iraq and Syria nga idauluan ni Abu Bakr Al Baghdadi, a narungrongsot nga amang ngem ti Al Qaeda.#

Comments are closed.