Footer

2 paltog, balbala, nasamsam ti kapolisan iti search operation

MAGSINGAL, Ilocos Sur – Tallo a balay ti naggigiddan a pinakatan ti nagtipon nga elemento ti kapolisan iti search operations idi agsapa ti Septiembre 29 ngem maysa laeng ti nagpositibo iti paltog ken balbala.

Iti naggigiddan a search operations nga inwayat ti Magsingal police ken kameng ti PIB iti tallo a balay iti Barangay Caraisan, Magsingal, Ilocos Sur, negatibo ti resulta ti panagsukisok iti balay da Joel Taong y Reyes, 41, naasawaan, mannalon; ken ni Roberto Taong y Reyes, 46, naasawaan, mannalon.

Ngem nakaeskor dagiti operatiba idi nakasukainda iti balay ni Jayson Taong y Reyes, 33, awanan asawa, iti dua a paltog ken balbala.

Nakasamsam dagiti polis iti balay ni Jayson iti maysa a Cal .45 pistol Armscor nga addaan SN 785261; maysa a converted cal. 22 rifle; 7 a bala para iti cal. 45 ken maysa a nangisit a holster.

Imet dagiti polis ti search warrants No. 48. 49, ken 50 a pinirmaan ni Judge Rahpiel Alzate ti Regional Trial Court, Branch 24, Cabugao, Ilocos Sur a napetsaan iti Septiembre 27 idi inwayatda ti operasion iti tallo a balay.

Iti pannakaisurat daytoy, maisagsaganan ti kaso a panaglabsing iti RA 10591 maikontra ken ni Jayson Taong y Reyes.

Kabayatanna, napilaan iti kaso a panaglabsing iti RA 10591 ken RA 1965 ti maysa a lalaki kalpasan a nakasukain dagiti elemento ti kapolisan nga adda ikutna a droga ken balbala idi impakatda ti panagsukisok iti balayna idi agsapa ti Septiembre 25.

Maipalagip a sinukimat dagiti nagtitipon a kapolisan a pakaibilangan ti police station ti Santiago, ISPPDEU, ISPIB, RID PRO1, 103RD Maritime ken PDEA ISSET ti balay ni Sabado babaen ti bileg ti search warrant No. 7 ken No. 8 a pinirmaan ni Judge Gina Juan Chan ti Regional Trial Court Branch 22, Narvacan.

Nakakumpiska dagiti otoridad iti balay ni Sabado iti siam a babassit a heat sealed plastic sachet a nagkarga iti mapapati a shabu, 7 nga awan ti kargana a plastic sachet a maaramat a para repacking iti shabu, 8 a bala ti cal 5.56mm, 4 a bala para iti cal. 9mm ken 8 a bala para iti cal. 22.

Kinuna ti polis a kabarbaro a drug personality ni Genaro Sabado y Agbulos, 35, naasawaan, drayber, nga agop-operar iti Santiago ken kabangibangna a munisipalidad. (Tawid News)

Comments are closed.