Footer

BANNER: 7 paltog, naisuko, 2 narekobre manipud Sept. 15-30: PNP report

CAMP ELPIDIO QUIRINO, BANTAY, Ilocos Sur – Pito a paltog ti naisuko iti polis idinto a dua ti narekobre manipud Septiembre 15 agingga iti Septiembre 30, daytoy ti report nga impatulod dagiti nadumaduma a police station a iti Provincial Police Office ditoy.

Kas maarisit kadagiti report, kaadduanna kadagiti naisuko ket paltik ken saan a lisensiado.

Sadiay Barangay Nagsupotan, San Juan, insuko da Barangay Captain Braulio Tabion, Jr., 59, ken Chief Tanod Sabino Agustin y Puda, 45, ti maysa a cal. 38 SPL, Made in USA ngem awanan iti serial number a nagkarga iti maysa a bala.

Kinuna ni Tabion a nasarakanda ti paltog a naisulbong iti camouflage holster iti abaga ti kalsada sadiay Sitio Sadiri ti nadakamat a barangay bayat ti panagpatroliada idi rabii ti Septiembre 15.

Sadiay Barangay Bequi-Walin, Lidlidda, Ilocos Sur, boluntario nga insuko ti maysa a lumugar a nainaganan Rolando Darao y Joaquin ti maysa a cal. 38 paltik bayat ti panagbisita dagiti polis iti panangidaulo ni PSI Roger W. Baling-oay kas paset ti agtultuloy a panangipakatda iti Oplan Tokhang and enhanced Bilang Boga.

Manipud iti Barangay Pacang, Sta. Maria, mismo a napan iti police station ni Barangay Captain Danilo Bitania y Tamayo, 47, tapno isukona ti maysa a home made cal. 45 pistol.

Kinuna ni Bitania a naipaima kenkuana ti paltog a nasarakan ti maysa a kalugaranna iti barangay road bayat ti pannakaangay ti clean-up drive iti nadakamat a barangay idi Septiembre 16.

Maysa a di nainaganan a kalugaranna ti nangisuko iti homemade gauge 12 shotgun, segun met ken ni Barangay Captain Helena Flores ti Bayubay Norte, San Vicente idi impaimana ti nasao a paltog iti San Vicente police station idi malem ti Septiembre 17.

Idi malem ti Septiembre 18, personal nga insuko ni Godofredo Ridad y Ablang, 56, residente iti Barangay Burgos, Sta. Lucia, Ilocos Sur ti dua a rifle grenade iti police station.

Segun ken ni Ridad, nasarakanna dagitoy iti storage room ti balayda bayat ti panagdalusna.

Mapapati a kukua ti pimmusayen nga ulitegna a dati a kameng ti Philippine Army dagiti rifle grenade.

Idi sardam ti Septiembre 20, bayat ti yiisbo ti maysa kadagiti agpatpatrolia a polis, nakitana ti maysa a berde a back pack a naipasirok iti sementado a lamisaan iti Gabriela Silang Memorial Park iti Sitio San Jose, Barangay Magsaysay District, ket idi sinukimatna, naduktalanna a malaksid kadagiti aruaten, naglaon daytoy iti homemade shotgun ken maysa a bala a naikarga iti chamberna.

Awan ti nakitada a pakatuntonan no asino ti akinkukua iti back pack.

Kabayatanna, nagbunga ti information drive nga inwayat ti kapolisan sadiay Barangay Pandan, Caoayan ta maysa a homemade gauge 12 buckshot ti naisuko ken ni Punong Barangay John B. Soberano idi malem ti Septiembre 27.

Dagus nga inyawat ni Soberano ti paltog kadagiti otoridad iti dayta met laeng a malem.

Idi malem ti Septiembre 28, personal a napan iti Vigan City Police Station ni Cabaroan Daya Barangay Captain, Edmund Atanes Supnet, 50, ket insukona ti maysa a homemade cal. 38.

Kinuna ni Supnet a maysa a kalugaranna a dina innaganan ti nangisuko iti nadakamat a paltog.

Idi agarup 10:40 ti bigat ti Septiembre 29, maysa a tawag iti telepono ti naawat ti Nagbukel police station manipud ken ni Kagawad Jayson Cabunoc y Reyes, residente iti Barangay Poblacion West a nakasarakda iti homemade shotgun iti likud ti barangay hall.

Naipaima ti paltog iti police station para iti umisu a disposision. (Tawid News)