Footer

Negosiante, nagandat ti biagna

BANTAY, Ilocos Sur – Nagandat ti biag ti maysa a negosiante iti uneg mismo ti resortna sadiay Barangay Sinabaan, ditoy nga ili idi malem ti Septiembre 29.

Kuna ti kapolisan ditoy nga agtultuloy ti panagkalapda iti impormasion no ania ti motibo ti pannakapaltog ni Patricio Orio y Padre, 62, naasawaan, residente iti Barangay Bulag West, Bantay, Ilocos Sur iti mismo a Jaja Hidden Water Park Resort a kukua met laeng ti negosiante.

Kas maibatay iti report manipud iti police station ditoy, madama ti panaggiinum iti nasao a resort ti biktima, kaduana da John Albert Dofredo, 24, naasawaan, residente iti San Pablo, Sto. Domingo, Ilocos Sur ken Monroe Callejo y Asingan, 59, naasawaan ken residente iti Cabigbigaan, Sto. Domingo, Ilocos Sur idi manipud iti likudanda, immasideg ti suspek ket pinaltoganna iti sumagmamano a beses ni Orio sa dagus a naglibas iti saan nga ammo a direksion.

Nagsagrap ni Orio kadagiti sugat iti nadumaduma a paset ti bagina ket intaray ti anakna a ni Amor iti Metro Vigan Cooperative Hospital, Bantay a pakatamtaminganna.

Segun iti inisial a panagimbestiga dagiti polis, nakaaruat ti suspek iti short pant, nangisit a t-shirt, nangisit a bull cap, ken nagaritos.

Iti met panangproseso ti SOCO team manipud Ilocos Sur PPO iti crime scene, nakarekobreda iti tallo a kapsula, 3 buli, ken 2 a bala manipud iti caliber 45. (Tawid News)