Footer

Siensia para kadagiti tattao, iwayat ti DOST 1 iti Candon

Ni Imelda C Rivero, PIA 1, Ilocos Sur

VIGAN CITY – “Siensia para kadagiti tattao.” Daytoy ti tema ti maangay a selebrasion ti 2017 Regional Science and Technology Week ken Science and Technology Caravan iti siudad ti Candon no Oktubre 3-6 diay Candon City Civic Center ken Center for Culture and Arts iti siudad ti Candon, kuna ni Ramon Sumabat, hepe ti Department of Science and Technology (DOST) iti Ilocos Sur itay lawasna.

Innayon ni Sumabat a maitandudo ti siensia ken teknolohia kadagiti tattao babaen dagiti nasurok a 40 a partuat ken produkto kas iti panagaramid iti laminated a kawayan, panagpamaga iti materiales nga aggapu iti bakir ken agrikultura, panagaramid iti aspalto babaen iti plastic, tea ken kapsula manipud guyabano, sistema ti panagidulin iti mani, makina nga agiraep iti pagay a maikabil iti traktor, ken dadduma pay.

Maipakita pay dagiti umno a teknolohia babaen kadagiti seminar. Addanto pay maangay a panagsanay para kadagiti mabalin a makatulong iti ekonomia dagiti pamilia. Kasta met a maidisplay dagiti produkto dagiti natulongan iti DOST a babassit a negosio iti rehion.

Para dagiti estudiante addanto interactive science exhibits, quiz bee, science and technology trivia, seminar, invent school program ken mobile planetarium. Libre amin dagitoy.

Inton Oktubre 3, mailunsad ti Philippine Standard Time, pannakalukat dagiti exhibits, press conference, RxBox healthcare service, mobile planetarium, calibration services, techno-based bazaars, technology forum, DOST-SEI 21st century model classroom no sadino a mausar ti virtual and augmented reality tools para iti panagisuro ken panagadal, kasta met ti DOST courseware para ti siensia ken matematika. Mairugi pay a maiparang dagiti science interactive exhibits, science and technology trivia ken fellowship night.

Agtultuloy dagiti aktibidad a maangay manipud Oktubre 4-6. Iti malem ti Oktubre 6 maiyawat dagiti pammadayaw kalpasan ti pannakaipresentar dagiti kabarbaro a suporta ti DOST kadagiti babassit a negosiante kas ti Small Enterprise Technology Upgrading Program, dagiti serbisio iti chemical, microbiological ken metrological testing, tulong ken panagkonsultar, pannakailako kadagiti produkto, ken pannakaipakete ken pannakaikabil dagiti etiketa.#