Footer

BANNER: Satanic rosaries mailaklako iti Ilocos Sur, naiballaag kadagiti mamati

VIGAN CITY – VIGAN CITY – ADDAN dagiti maibilang a satanic rosaries ken dadduma pay a religious articles iti Ilocos Sur ket nasken ti panagamiris dagiti mamati kadagiti ar-aramatenda ta amangan no maisupadi dagitoy kadagiti kadawyan nga us-usaren dagiti Katoliko ket mangipaayda iti kinadakes iti panagbiagda..

Dayta ti ballaag dagiti padi iti Arkidiosesis ti Nueva Segovia nga idauluan ni Arsobispo Marlo M. Peralta ta natakuatan nga addan dagiti maibilang a satanic rosary a naalada ken naisuko kadakuada dagiti Katoliko kadagitoy a klase ti rosario. Naduktalan pay nga addan dagiti mailaklako a maibilang a satanic articles kadagiti pagtagilakuan kadagiti religious items iti probinsia.

Nagballaag kadagiti Katoliko ni Rev. Fr. Santos Rabang, Archdiocesan Director ti Commission on Christian Formation ken mabigbig a beterano nga exorcist iti Nueva Segovia iti panagannadda kadagiti maibilang a satanic rosaries, crucifix amd medals nga addaan kadagiti simbolo ti anti-Christ group nga Illuminati.

Impakaammona nga amirisen koma a nasayaat dagiti iwarwaras, gatangen, aw-awaten ken us-usarenda a rosario, krusipiho ken medalia ta amangan no dagitoy ket dagiti maikontra iti pammati ken mangisangbay iti lunod ken kinadakes. Imbalakadna a kasapulan a dagiti mausar a rosario, krusipiho ken medalia ket dagiti binendisiran dagiti padi ken awan dagiti linaonna a simbolo nga init, uleg ken diamante ta dagita ket simbolo ti grupo a kontra-Kristo.

Pinalagipanna dagiti mamati a no makaalada kadagiti satanic articles ket saandan nga iwaras ken usaren, ngem isukoda ketdi kadagiti am-ammoda a papadi.

Sakbay ti pannakakompiskar ken pannakaisuko dagiti maibilang a satanic rosary iti Nueva Segovia ket immunan a naipadamag iti national media iti kaaddana sadiay Metro Manila ken dadduma pay a lugar iti Pilipinas. Immuna a nagballaag ni Libera Nox Chief Exorcist Fr. Ambrosio Nonato Legaspi iti Diosesis ti Novaliches ti kaaddan dagiti satanic rosaries ken religious items iti pagilian. Impakaammona a dagiti satanic rosary ket iwarwaras ti grupo nga Iluminati. Impakammona a dagita a rosario ket nakararagan iti demonio tapno ti mangaramat ket sumurot iti dakes nga espiritu. Kinunana a naaramid dagitoy a rosario tapno maipadawat ken allilawenna dagiti Katoliko ket dagiti dakes nga espiritu ket umapay kadakuada.

Dagiti rosario a nakompiskar ken naisuko iti Nueva Segovia ket naiwaras wenno naited laeng kadagiti nakaalaanda a saanda nga ammo no ania ti klasena ken no ania ti mabalin a mapasamak kadakuada no aramatenda. Impakaammo ni Fr. Rabang a dagiti nakompiskar ken naisuko kenkuana a satanic rosary ket maurnongda pay sananto mammaminsan nga iwayatan ti kararag ken narelihiosuan a rito sakbay a mapuoran wenno madadaelda. (Eden Alviar)

Comments are closed.