Footer

Chief tanod, aksidente a nakapaltog bayat ti riri

SANTA, Ilocos Sur – Aksidente a napaltogan ti maysa a chief tanod ti karirina bayat ti sugal iti natayan idi rabii ti Oktubre 9 sadiay Barangay Pasungol, ditoy nga ili.

Nainaganan ti nakadisgrasia a chief tanod a maysa nga Adriano Cacho Jr. y De Peralta, 40, ken residente iti nadakamat a lugar idinto a maysa a Gregorio Laurente y Vergara, 22, awanan asawa, ti biktima.

Kas maibatay iti police journal, agsusugal iti baraha da Cacho ken kabarangayanna iti natayan iti lugarda ngem adda napasamak a saanda a panagkinnaawatan ken ni Arnulfo Martinez y Raqueño ket mapapati a binunot ni Cacho ti paltona a pangbutbutengna iti karirina ngem nakalbitna ti gatilio a nakatiruan ti makannawan a tumeng ni Laurente nga agbuybuya iti asidegda.

Intaray dagiti kabagian ken gagayyemna ni Laurente iti Ilocos Sur District Hospital, Narvacan para iti pannakaagasna idinto a naglibas ti suspek iti saan nga ammo a direksion, kuyogna ti paltogna.

Nangiwayat dagiti polis iti pursuit operation ngem saanda a nasapulan ti suspek.

Nakarekobre dagiti inbestigador iti crime scene iti maysa a kapsula ken naiputok a bala a mapapati a nagtaud iti cal. 45 iti nakapasamakan ti krimen.

Agtultuloy ti panangsapul dagiti polis iti suspek. (Tawid News)