Footer

SINURSURAN: Daytoy Panagpadigo ken Panagkakarruba

Kolum ni Jobert M. Pacnis

(Umuna a paset)

MALAGIPMO pay no kaano daydi naudi a nagpadigo ti kaarrubam? Wenno kaano daydi naudi a nagpadigoka iti karrubam?

Paset ti kulturatayo nga Ilokano ti panagpadigo— saan laeng nga iti kabagiantayo ngem pati pay dagiti assideg a karrubatayo.

Pangpakayammet iti relasion, dayta ti kangrunaan a rason.

Isu a saanen a nakakaskasdaaw nga agaammo idi amin nga agkakarruba. Agsisinnakitda. Agbibinnadang. Ammoda ti kasapulan ti tunggal maysa.

Iti panagpadigo, saan laeng a ti taraon ti maidiaya. Maidiaya, maistoria met dagiti padas iti nagmalem. Iti kastoy a wagas, mabalin a makasakdo iti adal ti maysan-maysa.

Nga ad-adda pay a mangmuli iti panagkakarruba.

Iti panagpinnadigo, saan a maumsi ti adda a maidiaya. Saan a kitaen ti umawat ti klase ti taraon: no nabaknang wenno nanumo laeng.

Ti napateg, nagtaud iti puso ti maipadigo. Naim-imas met laeng ti panagsaadna iti boksit.

Ti pay agpadigo, saanna a namnamaen a mapadigoan kas subad ti impadigona. Awan dayta iti panunotna. Kayatna laeng nga iburay ti adda a nanumo a nabaelanna nga insagana para iti pamiliana.

Ti napadigoan, saan a mailadawan ti ragsak a mariknana. Seknan iti pannakkel no maminsan. Ta nalagip ti karrubana! Kayatna a sawen, napateg daytoy kenkuana.

Ket nupay di mangnamnama iti supapak ti nagpadigo, kas pagyaman, ikagumaan ti napadigoan ti makasubad. Ket nupay sumangkanumo met ti maipadigona, saan a tubeng dayta. Ti nasken, maipamatmatna met a napateg ti nagpadigo a karrubana.

Ngem iti panaglabas ti panawen, daytoy a pinnadigo, natibnokan iti di maikanatad a panangipapan ken ugali.

No saan a dagus a makapadigo ti napadigoan, maipapan a dayta laeng umaw-awat ti kayatna. Maruam a mapadpadigoan.

Saanna nga ammo ti agsubad.

Ngem ania ngarud no awan ti kawadwadan ti nasapulanna. Apagisu laeng iti pamiliana. Ken nakababain met no saan a nabaknang a taraon ti pagsubadna iti nabayagen a pannakapadpadigona.

Nakababain?

Wen, natibnokan itan ti panagbain ti rikna no mapadpadigoan a saan a makapadigo a dagus. Nga idi damo, awan daytoy a rikna. A ti kaskenan iti pinnadigo ket ti kinnayammet ti panagkakarruba. Ti panagsisinnukat kadagiti padas iti nagmalem.

Ti pay madi nga ugali itan iti pinnadigo, maumsi metten ti maipadigo. No nanumo laeng, maliblibbian.

Ti kadaksan, baka apaglikud ti nagpadigo, maidiretso a maipakan/maipasida iti aso ti naipadigo.

Naspak ti panagkakarruba no maammuan ti nagpadigo!

Adda pay ngaminen dagiti irantada ti agpadigo no maangotda a sumaretset ti pariok ti karrubada. Namnamaenda ngaminen a maramananda dayta a sumaretset no agpadigoda uray iti kanunumuan laeng a taraon.

Ta agbain a di mangted ti napadigoan!

(Adda tuloyna)

Comments are closed.