Footer

2 ubing, nalmes iti nauneg a kali

STA. CATALINA, Ilocos Sur – Dua nga ubing ti naireport a nalmes bayat ti panagdigosda iti nauneg a kali a napno iti danum iti maysa a talon sadiay Barangay Cabittaogan ditoy nga ili idi malem ti Oktubre 24.

Dagus a nagresponde dagiti polis-Sta. Catalina idi naawatda ti report ni Barangay Kagawad John Christian Raqueño nga adda nalmes a dua nga ubing a lalaki iti lugarda ngem naitarayen dagiti residente dagiti biktima a nabigbig idi agangay a da Vein Cholo Ragasa y Singson, 7, ken Jerome Anyog y Ramboyon II, iti St. James Hospital a nakaideklaraanda a nataydan.

Iti panagimbestiga dagiti polis, naammuan a sakbay ti aksidente, nagay-ayam iti talon a kaabay ti yan ti kali dagiti biktima ken dagiti kataebanda a nabigbig a da Zean Ragunjan, 8, Joemar Regaspi, 12, Tristan Ragsa, 11, ken Louie Arsebal, 11, residenteda amin iti Brgy Cabittaogan, Sta. Catalina, ngem mapapati nga inkeddeng da Ragasa ken Singson ti napan nagdigos iti yan ti nauneg a kali idinto a dida ammo ti aglangoy.

Idi nakita dagiti kaay-ayamda a malmesen dagiti biktima, napanda nangarayat kadagiti lumugar a dagus met a napan nangalaw kadakuada.

Naitaray dagiti dua iti ospital ngem nataydan a naidanon iti balay pagagasan.#

Comments are closed.