Footer

2 lalaki, natiliwan nga agikut iti paltog

CANDON CITY – Adda latta dagiti suweng nga agisakbit iti paltog iti baet ti nainget a kampania ti kapolisan maikontra iti loose firearms.

Dua manen a lalaki ti natiliwan dagiti polis nga agikut iti paltog bayat ti panagiwayatda iti checkpoint sadiay Barangay Poblacion, Galimuyod idi malem ti Oktubre 15 ken iti maysa a paginuman sadiay Barangay Paras ditoy siudad idi 11:20 ti parbangon ti Oktubre 16.

Iti immuna a report, tiniliw ti nagtitipon nga elemento ti Galimuyod police station ken ti RPSB1 2nd Maneuver Company ken ISPPSC ni Rolly Oquendo y Ramos, 39, naasawaan, dati a security guard ken residente iti Barangay Vical, Sta. Lucia, Ilocos Sur kalpasan a nasukalan nga adda ikutna a cal. 38 homemade revolver nga awanan iti serial number a nagkarga iti dua a bala.

Sakbayna, iti checkpoint iti Candon-Salcedo Road, partikular iti Barangay Poblacion, Galimuyod, pinara dagiti polis da Herman Vilog y Andres ken Oquendo a nagkalugan iti motorsiklo gapu ta awan ti helmet ti maysa,

Nadlawan dagiti polis ti panagpapaigid ni Oquendo ket inasitganda sada dinamag no ania ti naggian iti imetna nga sling bag.

Inaresto a dagus dagiti polis ni Oquendo apaman a naammuanda a nagkarga ti bag iti paltog.

Kabayatanna, nasukalan ni Owen Rentutar y Agrisola, 28, baro, ken residente iti Barangay San Agustin, Candon City a nakasakbit iti homemade gauge 12 back shot idi simrek a mapan uminom iti Bojek Bar and Resto sadiay Barangay Paras idi agarup 11:20 ti rabii ti Oktubre 16.

Nagsuspetsa ni Edmund Urmin y Quiba, bouncer, ta nagtimbukol ti siket ni Rentutar isu a rinikisana a nakasukalan nga adda sakbitna a paltog

Dagus a nagresponde dagiti polis a tinawagan ti bouncer ket idi pinaingatoda ti bado ni Rentutar, nakitada nga adda sakbitna a gauge 12 homemade backshot a nagkarga iti maysa a bala. Sabali laeng ti dua pay a bala a nasukainan dagiti polis iti bulsa ti suspek.

Idi awan ti maiparang ni Rentutar a lisensia, inareston dagiti polis sada impan iti police station agraman ti nasamsamda a paltog para iti umisu a disposision. (Tawid News)

Comments are closed.