Footer

BANNER: Pannakapaltog ti tropa ti gobierno bayat ti bayanihan, nakondenar

QUIRINO, Ilocos Sur – Kinondenar dagiti opisial ti Armed Forces of the Philippines ken Philippine Army ti pammaltog nga insayangkat dagiti mapapati nga snipers ti komunista a terorista iti bunggoy dagiti soldado bayat ti panangisayangkatda iti bayanihan sadiay Barangay Patiacan ditoy nga ili idi malem ti Oktubre 15.

Napasamak ti pammaltog babaen ti mapapati a dua nga snipers bayat ti bayanihan activities ti 81st IB, PA nga indauluan ni Sgt. Ronnie B. Lontoc iti Patiacan Elementary School a nakatayan ti maysa a soldado ken nakasugatan ti sabali pay.

Naideklarar nga awanen ti biagna ni PFC Peter Jhon R. Villanueva idi maidanon iti Primary Health Care Facility, Poblacion, Quirino.

Naiyalis met iti PFC Esmael Michael Mama iti Ilocos Training Regional Medical Center, San Fernando City, La Union para iti ad-adda pay a naan-anay a pannakatamingna. Mismo nga ineskortan dagiti polis ti Quirino ken kameng ti RPSBI ti ambulansia iti panagbiahena a napan iti San Fernando City.

Iti statement a naipatulod iti Tawid News, kinondenar ni MGen Felimon T. Santos, Jr., AFP, Commander ti 7th Infantry Division, ti harassment nga inwayat ti KLG Montes a mapapati nga agop-operar iti tri-boundary ti Mt. Province, Ilocos Sur ken Abra ket imbatadna nga agsungbatto daytoy iti inaramidda.

Mapapati a naikappeng iti KLG Montes dagiti snipers a nangpaltog iti bunggoy dagiti soldado.

Napnuan dakes daytoy panangpaltog dagiti rebelde nga NPA iti tropa idinto nga adda iti aglawlaw dagiti sibilian,” kinuna ni Col. Henry A. Robinson, Jr. (MNSA) PA, 702nd Brigade Commander idinto nga impatalgedna nga iti baet ti napasamak, agtultuloy latta ti panangipaay ti Army kadagiti kangrunaan a kasapulan dagiti agindeg ken pannakaprotektar ti Barangay Patiacan maikontra iti kinadamsak ti local a terorista a grupo.

Kinuna met ni Lt. Col. Eugenio Julio C Osias IV INF (GSC) PA, Battalion Commander ti 81st Infantry Battalion nga inwayat dagiti snipers ti pammaltog agsipud ta awanen ti pangalaanda iti pinansial a tulong gapu ta saandan a makakikil iti komunidad gapu iti pannakaideploy ti Community Support Program (CSP).

Innayon ni Osias a pagsungbatenda ti NPA gapu iti daytoy inaramidda nga inhustisia.

Agtultuloy ti pursuit operation ti Army maikontra kadagiti komunista a terorista a nangiwayat iti pammaltog kadagiti tropa ti gobierno sadiay Barangay Patiacan. (Tawid News)

Comments are closed.