Footer

Lending company, natakawan

NARVACAN, Ilocos Sur – Maysa a lending company ti naireport a natakawan sadiay Barangay Sta. Lucia ditoy nga ili a mapattapatta a naiwayat idi rabii ti Oktubre 17.

Nagreport iti polis ni Rogelio Pabuyan Abar, 36, awanan asawa, branch manager ti Puhunan Microventures Phil Financing Company Inc., ken residente iti Barangay Poblacion West, San Ildefonso, Ilocos Sur a sinerrek dagiti di pay nabigbig a mannanakaw ti opisina ti pagpapaayanna a kompania ket natakaw ti dua a laptop, 7 a tablet, 2 selpon a mapattapatta nga agbalor amin iti P99,000.00.

Iti panagimbestiga dagiti polis, naduktalan a dinadael dagiti mannanakaw ti door knob ti akinlikud a ridaw ti opisina ket ditoy ti mapapati a simrekan ken rimmuaranda.

Kabayatanna, maysa a paltog a nayisio iti maysa a caretaker iti boarding house ti naireport iti police station ditoy a mapukpukaw sipud pay idi Oktubre 12.

Inreport laeng ni Romulo La Peña Pasion, 73, naasawaan, residente iti Brgy. San Agustin, ditoy siudad idi bigat ti Oktubre 15 a mapukpukaw ti paltog ni Betty a baketna a Taurus 9mm pistol/PT111 a mapapati a tinakaw ti di pay nabigbig a suspek.

Segun ken ni La Peña, naited ti paltog ken ni Regie Domundon y De La Peña, 35, caretaker tapno adda armas daytoy no agbantay ti ipakpakaserana a balayna.

Kinuna met ni Domundon nga idi alas 7:00 ti bigat ti Oktubre 12, inkabilna ti nangisit a belt bag a naggianan ti paltog iti uneg ti nipa hut tapno sublaten nga usaren ti sumaruno nga agbantay.

Ngem naduktalan laengen ni Domundon iti sumuno nga aldaw a saan a nagreport ti mangsublat kenkuana nga agaywan ken awanen ti belt bag iti nangikabilanna.

Nagsawar ni Domundon ken nagsaludsod kadagiti agkaskasera ngem dina nasapulan ti belt bag.

Maysa a Rowena Buenavista y Gao-Gao, 25, sabali pay a caretaker, ken residente iti Barangay San Elias, Sigay ti nagkuna a nakitana ti nasao a bag idi agarup 1:30 ti malem iti nadakamat a petsa bayat ti panag-surf-na iti internet.

Agtultuloy ti panagimbestiga dagiti polis mainaig iti nasao nga insidente. (Tawid News)