Footer

Motorista, naikras gapu iti naspak a sanga

SANTA, Ilocos Sur – Gapu iti naspak a sanga ti mahogany a naibalangan iti kalsada, naikras ti maysa a motorista a puon ti nakayospitalanna.

Naitaray ni Ronald Cardenas y Bajet, 56, naasawaan, ken residente iti Barangay Cabangaran, ditoy nga ili iti Metro Vigan Cooperative Hospital gapu iti sinagrapna a dunor iti tumeng ken dadduma a paset ti bagina.

Segun ti report, agdaldaliasat nga agpaamianan ti Kawasaki Rouser a minaneho ti biktima ket idi addan iti Sitio Dan Jose, Barangay Magsaysay District ditoy met laeng nga ili, kellaat a naspak ti sanga ti mahogany ket nagtupak iti paset a madalanan ti lugan.

Gapu itoy, naatalan ni Cardenas ti sanga a puon ti pannakapukawna iti kontrolna iti manibela a nagresulta iti pannakaikrasna iti kalsada.#