Footer

BANNER: 3 babbai, nagpulong iti polis naballaiboda illegal recruiters

SANTA, Ilocos Sur – Tallo a babbai ti nagpulong iti police station ditoy nga ili a biniktima ida ti dua a kailianda a nangikari kadakuada iti trabaho iti maysa a pagilian iti Middle East ngem awan met gayam.

Idi agarup 10:15 ti bigat ti Oktubre 27, nagpulong iti polis ditoy da Rosanna Burgos y Davalos, 25, awanan asawa, residente iti Brgy. Magsaysay District, Santa, Ilocos Sur; Maria Angela Verceles y Baldo, 25, naasawaan; ken Benie Rose Alconis y Gose, 23, naasawaan, agpada a residente iti Brgy. Sacuyya Norte, Santa, Ilocos Sur, a kinarian ida da Angelene Fernandez y Galinato ti Barangay. Sacuyya Norte ken Analyn Aquino y Saraos ti Brgy. Basug, Santa, Ilocos Sur, nga agtrabaho iti Dubai, United Arab Emirates ngem awan met gayam agur-uray a pagtrabahuanda sadiay.

Kinuna dagiti biktima nga impatalged dagiti suspek nga adda agur-uray nga employerda iti nasao a pagilian ken maawatda a sigida nga agtrabaho.

Iti pulong dagiti biktima, idi nakasangpetda iti Dubai, sinabat ida ti maysa a Rose Balaong y Deza, mapapati nga ahente ti maysa a travel agency sadiay, sada naipan iti Al Najem Services (Travel Agency) a naggiananda ngem awan ti naited a pagtrabahuanda.

Kinuna pay dagiti biktima nga innala ni Balaong ti pasaporteda ken agbayadda iti P150,000.00 tapno maalada dagiti pasaporte ken kas bayadda iti kinnan ken akomodasion.

Sa la nakaawid dagiti biktima iti pagilian idi Oktubre 23, 2017 kalpasan ti panagbayadda ken ni Balaong.

Segun iti polis, isagsaganadan ti kaso a panaglabsing iti Sec. 6 ti RA 8042 wenno illegal recruitment maikontra kadagiti tallo a suspek nga agtrabtrabaho amin iti Dubai. (Tawid News)

Comments are closed.