Footer

Bimmagkong iti amana, napakawan

CANDON CITY – Anak la ti anak uray kasano kinadakesna isu a pinakawan ti ama ti anakna a nangbagsol kenkuana.

Dinismis ti opisina ti city prosecutor ti kaso a parricide nga impila ti kapolisan maikontra ken ni Hanzel Gadingan y Gadiana, 32, residente iti Barangay Talogtog, ditoy a siudad kalpasan a nagpirma ti amana a ni Barangay Kagawad Danilo Gadingan y Mercurio, 55, iti apidabit ti desistance and motion to withdraw criminal information maikontra iti anakna.

Nagramut ti kaso iti panangbagsol ni Hanzel iti amana idi rabii ti Oktubre 22 a puon ti nakaiyospitalanna.

Kas maibatay iti blotter, matmaturog ni Danilo ken ti asawana idi nariingda gapu kadagiti kanabtuog iti ridaw ti kuartoda.

Idi linuktan ti kagawad ti ridaw, kinugtaran ni Hanzel a nabartek iti dayta a kanito.

Tapno dida agsubang, napan ti kagawad imminum iti danum iti kusina ngem sinurot ti suspek sa mapapati a ginandatna a gerreten ti tengnged ti amana babaen ti imuko ngem saan a nagballigi. Ginandat manen ti suspek a bagsolen ti amana ngem saanna a natamaan.

Timmaray ni Danilo a rimmuar iti balay sa nagpaarayat kadagiti kaarruba.

Inaresto dagiti nagresponde a polis ti suspek sada impan iti police station.#

Comments are closed.