Footer

9 mangngalap natiliw, illegal agkalkalapda iti kabaybayan

CABUGAO, Ilocos Sur – Iti baet ti kampania ti Bureau of Fisheries and Aquatic Resources maikontra iti illegal fishing ditoy probinsia, siam a mangngalap ti natiliw bayat ti illegal a panagkalapda iti kabaybayan a sakup ti Barangay Sabang ditoy nga ili idi malem ti Oktubre 3.

Dagus a agresponde dagiti polis ditoy apaman a nakaawatda iti tawag ti telepono manipud ken ni Kagawad Amado Belen ti Barangay Sabang nga adda nasiputan dagiti kameng ti Bantay Dagat a grupo ti mangngalap nga mangiwaywayat iti illegal a panagkalap iti kabaybayan bayat ti panagpatroliada iti igid ti baybay idi agarup 3:20 ti malem ti nadakamat a petsa.

Sakbayna, impakaammo dagiti kameng ti Bantay Dagat a pakaibilangan da Rex Sarabia y Socia, 25, awanan asawa; Ernesto Sarabia y Laurente, 34, awanan asawa, ken Eladio Cabero y Palacol, 42, nga adda nakitada a grupo dagiti mangngalap nga illegal nga agkalkalap iti kabaybayan a sakup ti barangayda.

Nabigbig idi agangay dagiti suspek a da Vergilio Salarzon y Manuel, 45; Pedro Gonzalez y Ballois, 23; Regie Gonzalez y Ballois, 26; Reynald Gonzalez y Ballois, 31; Maynard Ramos y Valle, 33; Jimmy Villegas y Ramos, 51; Cesar Ramirez y Ramos, 51; Devy Villegas y Ramos, 35; ken Julie Villegas y Ramos.

Nakakumpiska dagiti polis ken kamkameng ti Bantay Dagat kadagiti suspek ti agarup 16 kilos a nagduduma ti klasena a lames a mapapati a nakalap babaen ti cyanide.

Naipaima dagiti nakumpiska a lames ken ni Nerio Daproza, fishery coordinator ditoy nga ili idinto a naikustodia iti police station dagiti suspek. (Tawid News)

Comments are closed.