Footer

EDITORIAL: Panagbaba ti Satisfaction and Trust Rating ti Presidente

AGTULTULOY ngata ti panagbaba iti pannakapnek ken panagtalek dagiti umili ken ni Presidente Rodrigo Duterte kalpasan ti nasurok a makatawenna iti akem?

Maibasar iti kaudian a resulta ti Social Weather Station Survey, bimmaba ti Satisfactory Rating ti Presidente manipud iti sigud a “Very Good” wenno +66, ket nagbalinen a “Good laeng wenno +48. Nagpababa daytoy iti 18.

Bimmaba met ti Trust Rating ti Presidente. Manipud iti sigud nga “Excellent” wenno +75 ket nagbalin laengen a “Very Good wenno +60. Bimmaba daytoy iti 15.

Naisayangkat ti survey kadagiti 1,200 a nagsungbat nga agpapada a makabotosen manipud Luzon, Visayas ken Mindanao.

Positibo latta ti panirigan dagiti nasinged a kaaliado ti Administrasion iti panagbaba ti Satisfaction and Trust Rating ti Presidente ta pasado pay laeng ti marka a Good ken Very Good. Para kadakuada, awan aniamanna ti panagsuek ti rating ti Presidente ta uray idi panawen ti kampania ket nababa ti marka ni Duterte kadagiti surbey, ngem intarayanna met iti million a botos dagiti amin a nakasalisalna iti eleksion

Iti panagkita dagiti lider iti oposision, ti double-digit a panagsuek ti rating ti Presidente ket iyanninawna ti in-inuten a pannakaamiris dagiti umili iti gapuanan ken panagtalekda kenkuana a nangrugi iti nangato a marka manipud pay idi agakem a mangidaulo ti pagilian.

Para ken ni Senador Antonio Trillanes IV, kangrunaan a kritiko ti Presidente, ti panagsuek ti rating ni Duterte iti SWS third quarter survey ket pammaneknek a dagiti umili ket mangrugidan a maamiris ti pudno a galad, kababalin ken kabaelan ti nabutosan a Presidente.

Kadagiti naglabas nga administrasion, normal laeng ti panagbaba ti rating dagiti amin a nagakem a Presidente ti Pilipinas. Nangrugi iti nangato a rating dagiti nag-presidente – da Corazon Aquino, Fidel Ramos, Joseph Estrada, Gloria Arroyo ken Benigno Aquino III – ngem iti panaglabas dagiti tawen, bimmaba amin dagiti Satisfactory and Trust rating-da. Nag-negatibo pay dagiti dadduma.

Kadawyanen ti panagbaba ti rating dagiti nagakem ken agdama a presidente ti Pilipinas. Normal dayta ta iti panagakem ti Presidente iti maysa laeng a termino nga innem a tawen ket awanen ti pampanunotenna a re-election wenno pailayonto manen ta maminsan la ket ngarud a pabotosan ti presidente kas sagudayen ti 1987 Constitution.

Mabalin lattan nga aramiden ti Presidente dagiti kayatna nga iyimplementar a programa nga awan ti pagamakanna no makagura dagiti umili ta saan metten a mabalin a pailayon iti saadna. Saan a kas dagiti pangulo iti sabali a pagilian, kas sadiay United States of America, nga uppat a tawen ti termino ti Presidente ken mabalinna ti pailayon iti saadna.

Nagsuek ti rating ti Presidente ta mariknan dagiti adu a Pilipino ti kinaginad ti pannakagun-od dagiti adu a karina idi panawen ti kampania a mangpatalna ti pagilian ken mangpasayaat ti kalidad ti panagbiag dagiti umili. ImpaNnakkel ni Duterte idi panawen ti kampania a paksiatenna ti panagraira dagiti krimen nangruna ti illegal a droga iti las-ud iti tallo agingga iti innem a bulan. Inkarina a parmekenna ti kurapsion ken ikagumaanna ti pannakagun-od ti kappia iti sapasap a pagilian. Impasindayagna a padur-asenna ti ekonomia ken pasayaatenna ti kasasaad dagiti mangmangged ken mannalon. Imbidana ti panangsolbarna ti problema ti transportasion ken komunikasion, ken panangirupirna ti karbengan ti soberenidad kadagiti teritorio ti Pilipinas iti West Philippine Sea iti panangsakup ti China. Ngem ania dagiti nagapuanan ken ar-aramiden ti Presidente tapno matungpalna dagita a kari?

Mapapati a maysa kadagiti nagsuekan ti rating ti Presidente ket ti nadara a kampania kontra illegal a droga. Adu dagiti mangkritkritikar kenkuana gapu kadagiti mapaspasamak nga extrajudicial killings wenno dagiti summary executions dagiti masuspetsa a drug pushers ken users.

Imbes a dumngeg ti Presidente iti kritisismo dagiti human rights advocates kas ti Commission on Human Rights, United Nations, Europian Union, Simbaan Katolika ken dadduma pay a sektor a mangtubtubngar kadagiti pannakalabsing ti kalintegan dagiti tattao, ngem pagsasawanna ketdi ida kadagiti dakes a sarita. Iti ngamin naisayangkat a survey, siam iti kada sangapulo kadagiti 1,200 a napagsaludsodan, dagiti mayat a maarestar a sibibiag dagiti suspek nga adda pakainaiganna iti illegal droga.

Maibilang a nangato pay laeng ti Satisfaction and Trust Rating ti Presidente, ngem nasurok pay laeng isuna a makatawen iti akem, ket nagsueken ti panagtalek ken pannakapnek dagiti umili kenkuana. Binutosan dagiti 16 Million a Pilipino ni Duterte iti namnamada nga isu ti mangiturong ti pagilian iti nasayaat a kasasaad a nabayagen a tartarigagayan dagiti umili. Rumbeng laeng a susteneren koma ti Presidente dayta a panagtalek dagiti kaaduan a botante kenkuana ken supapakanna iti makapnek a serbisio kadagiti umili. (Eden A. Alviar)

Comments are closed.