Footer

Floor price ti tabako, naipangato

SAN FERNANDO CITY – Inrakurak ti National Tobacco Administration a naaprobaran ti ingangato ti floor price ti tobako para iti trading season 2018-2019 kabayatan ti serye ti Tobacco Tripartite Consultative Conference held at the NTA Central Office in Quezon City.

Iti maysa nga interbio, kinuna ni NTA Administrator Robert L. Seares a naaprobaran ti pannakaingato ti presio dagiti tallo a klase ti tabako a maimulmula iti pagilian kas iti Virginia, Burley ken Native kalpasan ti nabunga a negosasion iti nagbaetan dagiti tobacco farmers ken aggatgatang iti bulong ti tabako kalpasan ti tripartite conference a naangay idi Septiembre 6.

Dagiti sumaganad ti kabarbaro a floor price ti tabako: Para iti flu-cured Virginia tobacco: Grade AA – P82.00; Grade A -P81.00; Grade B -P80.00; Grade C P78.00; Php Grade D – P70.00; Grade E -P69.00; Grade F1 – P60.00; ken Grade F-2 – P 57.00.

Para iti Burley: Grade A -P70.00; Grade B – 67.00; Grade C – 58.00; Grade D – 47.00; Grade E – 46.00; ken Grade F 38.00. Ngimmato ti floor price manipud iti Grade A agingga iti Grade E iti P2.00 kada kilo, malaksid iti Grade F a ngimmato laeng iti P1.00.

Para iti native a tabako. ngimmato ti High-grade iti P71.00 manipud iti P70.00; Medium 1, iti P60.00 manipud iti P58.00; ken Medium 2 iti P50.00 manipud iti P48.00.

Saan a naingato ti presio iti reject tapno maupay dagiti mannalon ti produksion daytoy, kinuna ni Seares.

Kinuna ni Seares a kalpasan ti naballigi a negosasion, isentro ti NTA ti atensionna kadagiti programa para iti pannakaipabassit ti magasto iti produksion, kas iti pannakaited iti subsidia kadagiti mannalon.

Kinuna ni Seares nga iti pannakaituding dagiti floor price ti tabako, naited kadagiti mannalon ti tabako ti garantia a pannakaisubli tii investment ti saan a basbassit ngem 25 porsiento iti nagastoda agsipud ta nangatngato ti aktual a buying price iti naaprobaran a tobacco floor price.

Innayon ni Seares a namnamaenna nga ad-adu a mannalon ti agmula iti tabako iti daytoy a season agsipud ta tabako ti kangrunaan a cash crop iti Ilocos provinces kalpasan ti panagaani iti pagay. (Manipud iti report ni Freddie G. Lazaro, PIA 1, La Union)

No comments yet.

Leave a Reply