Footer

KUKKO

Imbiit ni Rilo Bedo

(Maudi iti dua a paset)

KAMALMANNA, rinantadak da Roselily, Beverly ken Glaizel iti garden a yanko nga agpagpagut kadagiti ruot. Kalkalpas ti maudi a period. Grade 9-da met laeng ngem sabali laeng ti section-da.

Apay?” inamadko ta saandak met nga adviser tapno ibagada kaniak nga awan ti floorwax wenno ni Kuarog wenno Kuanang ket saan a tumultulong iti panagdalusan.

Nakitam gayamen ‘diay naisurat iti pader, sir,” inrugi ni Beverly. “Ammomi no asino ti akin-aramid.”

Asino?” magagaranak a nagsaludsod. Naisardengko ti ar-aramidek.

Basaem daytoy, sir,” inyawat ni Roselily ti selponna.

PANOOOTTTT KANG TITCR KA. PKLMERO!!!!! BUHAY MO PKLAMAN M!

Richmond ti nakanagan a nagtaudan ti text. Permi ket ngata a pungtot wenno suronna idi iteksna dayta ta naka-capital letter pay!

Napangilangilak. Ngem diakon impalubos nga agpungtotak. Siakto met laeng ti marigatan. Pinagkalmak lattan ti riknak.

Agyamanak iti imporma-sion,” kinunak kadakuada.

Okey laeng, sir,” kinuna ni Glaizel. “Kinapudnona, saan laeng a ni Roselily ti nakaawat kadayta a text. In-GM ni Richmond kadagiti gagayyemna nga agbasbasa ditoy Cabaybay West National.”

Napasanamtekak laengen.

Pinaayabak a dagus ni Richmond. Kinasaritak iti mini-gym nga abay ti room-da.

Ngem natangken ti ulona. Inlibakna nga aramidna ti naisurat.

Adda la ngaruden text-mo a nabasak,” kinunak. Imbagak a nakitak dagiti in-GM-na.

Nagbiragsot. “Pabpabasolennak ketdin, sir!” kinunana. “Saanmo met a nakita! Adiay text, saan met a sika ti ibagbagak didiay!”

Rimmasuken ti darak. “Kayatmo a sawen, nairanrana laeng dagiti pasamak?”

Ammok pay!” awanen ti panagdayawna.

Lipakek la koma ngem nakapatpatak iti mugingko ti child protection policy.

Kayatko a kasarita dagiti nagannakmo inton bigat, Richmond,” kinunak laengen. “Urayek ida iti first period a bakantek.”

Dida masango!” kinunana ket tinallikudannakon.

Sinarunok. Saanko a binugkawan tapno di makadlaw dagiti adda iti aglawlaw nga ubbing. Ngem darasna a sinakayan ti motorsiklona idi makaruar iti ruangan. Nakaparking ngamin daytoy iti bangir ti kalsada a sirok ti barakbak.

Agurayka man, Richmond,” kinunak met laeng iti naalumamay a timek tapno saan pay a pumanaw.

Ngem dinak impangag. Pinaburborna ketdi ti motorsiklona ket insiweten a pimmanaw. Apagisu met nga ag-bell. Panagaawiden. Imbilinko laengen kadagiti ubbingmi a kaarruba da Richmond a masapul a makasaritak dagiti dadakkel daytoy. Saan la ketdi nga idanon ni Richmond ti nasaok kenkuana.

Ngem nadamagko laengen iti kabigatanna a nadisgrasia ni Richmond. Nakapaatal iti aso idi agawid idi malem-kalman.

Naan-ano ngarud?” inamadko.

Okey kano metten, sir,” kinuna ni Denis a kaarrubana. “Ngem nayarado ‘diay nga-tuen ti mugingna. ‘Ton agimbag, sigurado a pultak ti labasna!” Bangbangir ti isemna.

Naasianak. Nalagipko ti insuratna iti pader: Kukkok…

Inkeddengko a sarungkarak inton malem.#

Comments are closed.