Footer

Kukko

Imbiit ni Rilo A. Bedo

(Umuna iti dua a paset)

SIR,” maar-arakattot ni Nerissa a simmabat kaniak iti playground. Mapanak koman iti klaseda kadayta a maudi a period iti agsapa.

Apay?” inamadko. “Kaska met laengen napuoran?”

Adda ipakitak kenka, sir,” ket ingguyodnak iti CR iti abay ti room-da.

Simmaruno metten dagiti dadduma pay a kaklaseda a nakakita kadakami idi labsanmi ti kuartoda.

Basaem dayta, sir,” intudo ni Nerissa ti bakrang ti room-da a dumna iti CR.

Nakakadkadlaw ti kappinta a pader a nagudugodan iti natirad a banag. Addada naisurat.

Napasanamtekak. Simro manen ti kinagatel ti ima dagiti ubbingmi.

“’Yanna dita?” inamadko ta adu ti babassit a naisurat.

Daytoy, sir,” inyugedna pay ti imana iti naikuskos a naisurat.

Minirak. “Kukko si Sir Teody…” Kinudkodko ti ulok. “Diak maawatan…”

Saanmo nga ammo ti kukko, sir?” insengngat ni Myra, kaklase ni Nerissa, nga aw-awaganda iti Dagula ta bassit unay iti tawenna a sangapulo ket lima. Ngem ibagbagak kadakuada a gesdanda ti mang-bully ta mabalin a maidarumda.

Ilokanoak met, ammok, ‘ya ngarud,” kinunak. “Ania kad’ dayta?”

Aglima tawenkonton ditoy a deppaar a naglaok nga Ilokano ken Ibanag (nga ad-adu nga amang ti bilangda) dagiti ubbingmi ngem saanko pay a nasursuro ti lengguahe nga Ybanag.

Nagkakatawada.

Panottt!!!” adda nangibugkaw iti likud. Nga ad-adda a nagkakatawaanda.

Nariknak ti panagburek ti darak. Iti nasuroken a maysa a dekada a panagisursurok, iti daytoy pay laeng maikalima a pagadalan a nakapermanenteak, ti adda nakasao kaniak ti kasta.

Ammoyo no asino ti nagsurat?” Iti panangmingmingko iti naisurat, mabalin a landok wenno natirad a banag ti inggudugodda iti kappinta a pader. Uray la nalnalkab dagiti dadduma a pinta iti kadagsen ti pannakaisuratna.

Saan, sir,” insungbatda.

Ngem kellaat lattan a pimmatak iti isipko ti ladawan da Richmond ken Reyrick a kaklase met laeng da Nerissa.

Kadagupan kadagiti ig-iggamak nga ubbing, isuda laeng dagiti ammok nga adda gurana kaniak. Itay napan a lawas, binagbagaak ida kalpasan ti panangibinsabinsak ti lesson-ko kadakuada. Imbagak a saan nga adayo a dida makapasa no agtultuloy ti panaglanganda iti klasek.

Adda ugali da Richmond ken Reyrick a naayat nga ag-cutting classes. Kalpasan ti break, agpukawdan. No sumrekda met, saanda a pulos a makipaset iti diskusion. Namindua metten a nasukalak nga agpaypayubyobda iti likud a yan ti garden-ko.

Binagbagaak ida. Uray ammok nga ammoda ti dakes nga ipaay ti sigarilio iti salun-atda, inadalak latta ida. Imbagak metten nga ipamaysada koma ti arapaap dagiti nagannak kadakuada. Saanda koma a gastuen dagiti nagrigrigatan dagiti dadakkelda iti awan kaes-eskanna a banag—a makadadael pay met iti salun-atda.

Diak idi nauray a simmungbatda. Nakamisugsogda latta.

Kastada. Kasla awan pangipirpiritda kadagiti mannursuroda aglalo no dagiti kas kadakami a ganggannaet iti lugarda.

Gapu ta atapek lattan a da Richmond ti akin-aramid, nagtalimudoken iti naisurat ti sinasaok iti klaseda. Ngem diak imbatad nga isuda ti atapek. Ken nagtalinaedak a sikakalma.

Ammoyo, class,” kinunak, “dagiti agar-aramid ti kasta, addanto latta met ti pannakakarmada.”

Bad karma, sir,” kinuna ni Larah.

Mabalin a kasta. Ta tunggal aramidtayo, dakes man wenno naimbag, adda kaibatoganna a supapak.” Sinaggaysak a miningmingan ida. Namnamaek nga idumog da Richmond. Ngem kasla ketdin manglokloko ta bangbangir ti isemda idi agsabat dagiti imatangmi.

(Adda tuloyna)

No comments yet.

Leave a Reply