Footer

MASS SHOOTING SADIAY ESTADOS UNIDOS

Salaysay ni Eden A. Alviar

(Maudi a paset)

Tunggal adda mapasamak a mass shooting sadiay US, mapagungar dagiti kalikagum ken tignay para ti nainget a “gun control.” Ngem kalpasan a bumaaw dagiti kontrobersia, in-inutton a maiddep dagiti tarigagay para ti pannakapainget ti panagtagikua ken panagikut dagiti armas.

Uray ni Presidente Donald Trump ket madadaan para ti pannakaamiris a nasayaat ti “gun control” iti US gapu ti kiddaw dagiti makipagili. Ngem nabayag ken nainget a proseso ti pagdalanan daytoy a tignay ta adda dagiti nabileg ken impluensiado a sektor a mangisaysayangkat ti gun lobby ken napigsa ti political partisanship gapu ta maseknan dagiti sibilian nga agtagikua kadagiti ginasut a million a paltog. Basbassit met dagiti pumabor iti “gun control” a kaaduanna ket dagiti kapamilia ken supporter dagiti biktima dagiti mass shooting ken dagiti pammaltog iti nagduduma nga estado.

Mabalin nga adaptaren ti US ti “gun control” no kaaduan kadagiti umili ket kayat ken agtimekda, tapno ti Kongreso ket mangaramid iti baro a linteg. No saan nga agtimek dagiti kaaduan a makipagili, agtalinaedto latta a nalukay ti panagtagikua ken panagikut iti armas, ken addanto latta dagiti mapasamak a mass shooting a pakatayan ken pakasugatan dagiti adu nga inosente a tattao.

Kalaksidan ti mass shooting iti Nevada, napasamaken dagiti nadara a pammaltog kadagiti nadumaduma nga estado ti US kadagiti naglabas a tawen a nangkigtot ti lubong gapu iti kaadu dagiti biktima.

Napasamak ti mass shooting sadiay Orlando, Florida idi Hunio 12, 2016, a nakatayan dagiti 49 a tattao ken 58 dagiti nasugatan. Ni Omar Mateen, agtawen iti 29, ti suspek ken “hate crime” ti mapapati a motibo. Idi Abril 16, 2007, napasamak sadiay Blacksburg, Virginia, ti mass shooting a nakatayan dagiti 33 ken nakasugatan dagiti 17 nga estudiante ken mangisursuro iti Virginia Polytechnic Institute and State University. Ti krimen ket inwayat ni Seung-Hui Cho, estudiante ken agtawen iti 23, a mapapati nga agsagsagaba iti sakit ti utek.

Sadiay Sandy Hook Elementary School, Newtown Connecticut idi Disiembre 14, 2012, napasamak ti mass shooting a nakatayan dagiti 28 a tattao pakairamanan dagiti 20 nga ubbing nga agtawen iti innem ken walo, ken nakasugatan dagiti dua pay a biktima. Dayta a pammaltog ket inwayat ni Adam Lanza, agtawen iti 20 gapu iti mapapati a panagsagabana iti sakit iti utek.

Agdagup met iti 24 dagiti natay ken 27 dagiti nasugatan iti mass shooting iti Luby’s Cafeteria sadiay Killen, Texas idi Oktobre 16, 1991, gapu ti pammaltog nga insayangkat ni George Hennard, agtawen iti 35, gapu iti gurana kadagiti babbai ken kadagiti ethnic minority.

Sumagmamano laeng dagitoy a mass shooting sadiay US a nangibati iti buteng kadagiti umili gapu iti nalukay a panagikut ti armas ken irresponsible a panagaramat ti paltog.

Iti Pilipinas, umad-adu met ti bilang dagiti mangkidkiddaw ti pannakapainget ti panagtagikua ken panagitugot ti paltog gapu ti kaadun dagiti napaspasamak a krimen a ginubuay dagiti agtagikua kadagiti lisensiado a paltog kas kadagiti simple laeng a riri kadagiti kalsada gapu iti trapiko. Nasken koma a nainget ti PNP Firearms and Explosives Unit iti panangaprobarda kadagiti lisensia tapno dagiti laeng responsible ti makapagtagikua kadagiti lisensiado a paltog ket malisian dagiti awan-mamaayna a pammapatay.#

Comments are closed.