Footer

Motorista, natay; kalubbonna, nadunor iti aksidente

MAGSINGAL, Ilocos Sur – Natay ti nagmaneho iti motorsiklo idinto a nadunor ti insakayna gapu ti panangdungparda iti maysa a kayo idi rabii ti Oktubre 22 sadiay Barangay Norte ditoy.

Immuna a naitaray ni Dante Rosario Jr. y Mirafuente, 22, awanan asawa, trabahador, ken residente iti Barangay Panay Norte, Magsingal iti Northside Doctor’s Hospital, Bantay, Ilocos Sur sa naitaray iti Gabriela Silang General Hospital ngem saanen a naidanon pay a sibibiag.

Nagsagrap met iti dunor iti barukong ti inlubbonna a ni Ronnie Urro y Sebastian, 19, naasawaan, mannalon, ket naipaagas iti Northside Doctor’s Hospital.

Segun iti report, bayat ti panagdaliasat dagiti biktima nga agpalaud, napukaw ti kontrol ni Rosario iti manibela ti motorsiklona ket naidungparna ti lugan iti puon ti mahogany a iti abagatan nga abaga ti kalsada. Nakaro met ti dadael ti motorsiklo.

Mapapati a nakainom dagiti dua idi naaksidenteda.#

Comments are closed.