Footer

PARTAAN

Sarita ni Arnold M. Reyes

(Maudi iti dua a paset)

Nagbati ni Kompadre Tony. Bayat ti panagbiahek, nalipatakon ti tagtagainep ni Luisa.

Nangaldawak iti restaurant iti Bauang. Ditoy, nasarakak ni Ben. Nasingedkami nga agpagayam. Idi agbasbasakam’pay iti University of Cordillera, dakami latta ti agkuykuyog. Naikamang ni Ben iti Bauang ket ita man la nga agkitakamin.

Agbiahekan sa,” nakunak ta adda iggemna a bag.

Sumang-atak idiay Baguio. Maysan nga orasko nga agur-uray iti luganko, ngem diak met la makabislinen. Pusek dagiti agpa-Baguio,” insungbat ni Ben.

Agkuyogtan. Agpa-Baguioak met,” kinunak. “Naimbag ta adda kapatpatangko tapno diak agtuglep iti dalan.”

Ne, nagsayaaten,” nakuna ni Ben.

Bayat ti panagpatarayko, adu ti nagsasangaan ti panagpatangmi ken Ben. Nalagipmi ti kinaagtutubomi, dagiti linoloko nga inar-aramidmi idi agbasbasakami. Naammuak a sales supervisor ni Ben ket agpa-Baguio ta mapanna kitaen ti sanga ti kompaniada.

Addakamin iti beddeng ti La Union ken Benguet idi maysa a babai ti kellaat a nagpatnga iti dalan. Imbaddekko ti preno.

Kayatmo kadin ti matay?” makarurodak.

Pangaasiyo, tulongandak!” kinuna ti babai.

Pigispigis ti bado ti babai. Agdardara ti takiag ken rupana a gapuanan dagiti siit ken ipas dagiti bulong. Kusokuso ti buokna ngem saan a mailibak ti kinapintasna.

Ania kadi ti napasamak, ading?” inamadko.

Adda dua a lallaki a nangkidnap kaniak, Manong,” insungbatna. “Impaknidak iti maysa a kalapaw ket pinanggepdak a ramesen.”

Nailasinmo ida?” sinaludsod ni Ben.

Wen, Manong. Kinapudnona, agrayo kaniak ti maysa ngem bartekero ngamin ‘su a pinaayko.”

Manipud iti kaleddaan, rimmuar ti dua a lalaki. Nagsarimadengda idi makitadakami. Ngem idi agangay, immasidegda.

Itay pay la a birbirokendaka, honey,” kinuna ti nataytayag. Barbasan. Nabaneg. Iti pattapattak, agkaeda-dankami. “Intayon ket adda pay sabali a turongentayo.”

Saan, diak sumurot kadakayo!” kinuna ti babai.

Ginandat ti lalaki a guyoden ti babai ngem nagwagteng daytoy.

Manipud iti compartment ti kotse, inruarko ti bassit a bagko a nakaikabilan ti lisensiado a paltogko. Inlukatko ti ridaw ti kotsek saak dimsaag.

Pari, dimo piliten ti madi,” kinunak.

Ania koma ti bibiangmo!” pabaribar a sungbat ti lalaki. “Asawak dayta! Agim-imon iti angin!”

Ulbod!” kinuna ti babai. “Diyo koma patpatien ti ibagbagana!”

Inseniasko iti babai a sumrek iti kotse. Dinagdagusna a linuktan ti akinlikud a ridaw sa immuneg.

Pari, kuna toy babai a hinoldp-apyo. Nadagsen a kaso dayta!” Impisokko ti makannawan nga imak iti uneg ti bag.

Nagrinnukodkami iti lalaki.

Dimo ammo ti naserrekmo, ‘adre!” nakunana.

Saganaam ketdi ti pannakaidarummo, Pari,” nakunak. “Nakuna toy babai nga ipulongnaka iti polis. Duakami a testigo maikontra kadakayo no ituloyyo latta ti dakes a panggepyo kenkuana.

Bumanang-es a nagbaw-ing ti lalaki. Madamdama, nakangegkami iti ungor ti lugan iti nalikudanmi a dalan.

Ania, isuplongmo ida iti polis?” nasaludsodko idi agtartarayen ti lugan.

Kasta koma ti kayatko, Manong. Masapul a madusada,” insungbatna.

Kinitak ti oras iti pungupunguak. Alas dos y median. Alas singko ti komperensia. Nawaya pay ti panawenko a dumanon iti siudad.

Dimmagaskami iti munisipio ti Sablan. Agkakapsut pay laeng ti babai ket tinarabayko.

Inreportmi iti polis ti napagteng ti babai.

Kellaat a naperrengko ti babai idi maammuak a Remedios Soria ti naganna. Nalagipko ti natagtagainep ni Luisa nga adda kaduami a babai idi nakidinnungpar ti luganko iti sang-atan nga agpa-Baguio.

Saankon a naitaltalek ti dadduma pay a saludsod ti desk investigator. Madi ta madi lattan ti mariknak. Kayatkon ti agsubli. Saanen a nairanrana laeng daytoy, nakunak.

Ngem uray no kayatko a panawan ni Remy, simken ti asik kenkuana. Ganggannaet ditoy. Awan pay kuartana. Saan a maako ti konsensiak a panawanmi nga agmaymaysa kalpasan ti nagpasaranna Manangngaasi ti Dios, nakunak laengen.

No kasano ti annadko nga agmaneho, nakarkaro itan. Kasla naipigket dagiti matak iti kalsada.

Limmamiis ti pul-oy. Bimmaba ti napuskol nga angep a nangsallukob iti dalan. Narigaten a maripar ti kasinnabat. Pinagandarko ti wiper sako pinagsindi ti silaw. Inruar ni Ben ti diaketna ket intedna ken ni Remy a nakadalikepkep iti likudan.

Iti pagkurbaan, nasaripatpatak ti nangisit a banag a kasinnabatmi. Kellaat a nagbitek ti barukongko idi makitak a napardas ti panagtaray ti bagon. Daytoyen… daytoyen ti nagpartaan ken ni Luisa, nakunak. Nagikkis ni Remy idi dungparennakamin ti bagon.

Kellaat nga inawidko ti manibela iti kannigid, iti linia ti bagon. Nagpingki dagiti nagrinnadrad a metal. Nagkalangiking dagiti sarming a nabuong. Nagiwes-iwes ti kotse ta saankon a makontrol ti manibela ta saanen a kumpet ti preno. Gungugongen ti turongen ti lugan. Inawidko ti manibela ket impadungsok ti kotse iti bakras ti bantay sako ginutad ti tulbek iti ignition. Iti likudanmi, simmalpa ti bagon iti pader a semento, nagbalinsuek ket nagtulidtulid iti derraas!

KASLA SAAN a nakappapati, Kompadre,” nayesngaw ni Mario. “Saan ngata a bunga ti panunotmo dayta?”

Saan, Kompadre,” nakunak. “Talaga a napasamak kaniak.”

Naimbag ta imbes a sinurotmo ti liniam, inawidmo iti kannigid. No saan, napitpitkayo koman.”

Wen,” nakunak. “Agyamanak ta nagpartaan ken ni Luisa ti mapasamak ket kinontrak iti maudi a kanito.”

Baro a biag, Kompadre,” kinuna ni Mario.

Wen, baro a biag, Kompadre,” nakunak. “Ngem inta ketdin ta dinto ket agpartaan ken ni Luisa nga addata ditoy nga agin-inum.”

Nagkatawa ni Mario. Binayadanna ti nainummi ket rimmuarkamin iti restaurant.-#

Comments are closed.