Footer

Sinursuran: Daytoy Panagpadigo ken Panagkakarruba

Kolum ni Jobert M. Pacnis

(Maudi a paset)

Kadagiti paset a ‘yan ni Ilokano a natinggaw pay laeng ti panagpipinnadigo, saanda koma nga ipalubos a bumaaw daytoy a kaugalian. Agnanayon koma a napudot, kas iti dinengdeng, a mangpagil-ayab ti panagkakaarruba.

Makiddaw ti kastoy gapu iti agdadata ti kinapudno itan nga arig di payen agaammo dagiti agkakarruba.

Mapugpugsaten ti panagkakayammet nga impatawid pay da apong.

Saanen a maan-anninawan ti pannakikarruba. Mapukpukawen ti anag ti panagkakarruba.

Saan a narigat a simpuonen ti makagapu.

Nagbalinen a napardas ti panaglabas ti kanito. Agiinnuna dagiti dapan nga agsapul iti pagbiag, pangbiag iti pamilia. Nasapa a rummuar iti pagtaengan, nasipngetton no makasangpet. Dagiti dadduma, maminsan iti makalawas, makabulan wenno makatawen sakbay nga agawid.

Maysa pay a rason, daytoy social media.

Sangkadumog ti tumunggal maysa kadatayo ti selpon nga imettayo. Kasla saantayo nga agbiag a saan nga iggem ti selpon iti ania man a kanito. Daytoyen ti nagbalin a kapatpatangtayo.

Iti selpon, kasla nakitatayo dagiti adu a banag a saan a mabalin a tallikudan. Agpannuraytayo lattan kadagiti ragsak nga ipaayna.

Ta saan nga asi-asi itan dagiti features ti selpon!

Nagangayanna, saanen a makapagsasarita iti personal dagiti agkakarruba. No agsasabatda, saanda payen nga agpipinnaguni. Nakadumog lattan ti tunggal maysa kadagiti selponda.

Pinalawan ti selpon ti nagbabaetan dagiti agkakarruba.

Saan itan a karkardayo ti kasla awan interes ti kasarsarita. Kapatpatangmo ngem saanna met a maidisso ti gadget nga adda kenkuana. Daytoy latta ti sangkakuditna.

Saanen a kas idi a matukodmo iti ikikita/perreng ti kasarsarita no serioso iti ibagbagana wenno saan. Saanen a kas idi a tumibker ti relasion iti kasarsarita no naynay dayta nga aramiden.

Un-unasen itan dayta ti haytek a teknolohia!

Irason dagiti dadduma, narigat ti udong itan. Maudi iti pannagna ti panawen. Mabati nga agngatangata.

Masapul a sumurot iti agus ti panawen. Kinaudong kano itan ti paud-udi.

Agpayso, napardas itan ti pannagna ti oras. Naimbenton dagiti ramit a mangtulong ti tunggal maysa tapno saan a paudi iti agus ti panawen.

Wen, masapul dagita a ramit tapno saan a paudi. Ngem saanna a kayat a sawen nga ibati lattan dagiti nariingan a kannawidan.

Saan a panggep ti nakaimbento kadagitoy a ramit a dadaelen ti kinatao ti tumunggal maysa. Kayatna laeng ti tumulong.

Ngarud, kas maysa a namuli iti nabalitokan nga aw-awid da apong, datayo koma ti manarawidwid kadagitoy a ramit. Saan a datayo ti tarawidwidanda.

Saan a dagiti ramit ti usarentayo a mangdadael iti relasion ti nagbabaetantayo kadagiti kakabagian, gagayyem wenno am-ammo.

Usarentayo dagiti ramit nga agpipinnadigo iti kapanunotan, mangpatibker iti panagkakarrubatayo nupay miliamilia ti nagbabaetan ti tunggal maysa.#

Comments are closed.