Footer

SINURSURAN: Isuda a Namnama

Kolum ni Jobert M. Pacnis

(Maudi a paset)

Kas nagannak, isuda ti umuna a pakasursuruan ti ubing kadagiti bambanag a mabalin a tuladenna. Ania ngarud ti namnamaen a pagbanaganna no nariribuk ti aglawlaw a napuotanna? Nakapatpateg la unay ti panagbalin koma a modelo dagiti nagannak iti man aramid wenno sarita.

Pagsarmingan ida dagiti ubbing.

Saan nga ibaga ni tatang nga, ‘Anak, saanka nga agsigsigarilio ket makapadakes iti salun-at,’ idinto a makitkita met ti anakna nga agpaypayubyob daytoy.

Agbalin koma ti iskul a kasla komunidad. Kayatna a sawen, adda panagsisinnakit dagiti ubbing ken dagiti maestrada. Kasda la napaypayso nga agkakadaraan. Kasla uneg laeng ti pagtaengan ti panagrikna ti tunggal maysa— kamengda iti maymaysa a pamilia.

Marikna koma ni agtutubo ti kinapasetna iti pamilia wenno iti pagadalan. Adda daytay linas a mamagkonekta kenkuana kadagiti nagannak, kaadalan ken/wenno mannursurona.

No marikna ni agtutubo dayta nga ayat, koneksion, segun iti panagadal, adayo a seknan iti negatibo a bambanag a mabalin a pakaaramidanna iti maikaniwas. Mayadayo pay iti bisio ta adda dayta panagaripapana a mangsupli iti dakes dagiti pakarikriknaanna iti ayat.

TI nakas-ang ita a panawen, adun ng agtutubo ti masaysayang ti biagna gapu iti operasion kontra iti maiparit nga agas.

Saan a limed kadatayo dagiti agtutubo a biktima. Nagbalin a naaweng a damag daytoy gapu iti pannakaipatli dagiti inosente nga agtutubo. Ipetpetteng dagiti nagannak, kaarruba ken kabagianda nga inosente, nasingpet dagiti annakda.

Naglabes iti uged dagiti pannakabagi ti linteg, dayta ti ikkis ti kaaduan. Iramramandan nga ipakni uray dagiti awan pakainaiganna iti krimen. Saanen a maikkan dagiti biktima iti maikadua a gundaway.Adu payen ti report a basta lattan maitumba dagiti nagannak iti imatang pay met dagiti ubbing pay nga annakda. Ammotayon no ania a trauma ti paglasatan dagitoy a saksi. Nasayaat laeng no maagasan ket saan nga agbalin a mapenned a gura iti barukongda a madadaan a maiburuangto iti umno a panawen.

Saantayo a kontra iti kampania iti maiparit nga agas. Tagiuray ti kaaduan ti kaadda ti ngipen ti linteg a mangisaklang kadagiti nagbasol.

Aglalo ket nakaam-ames a krimen ti pasamaken dagiti mailuod itoy.

Ngem rumbeng koma a mapaneknekan nga umuna a nagbasol sakbay a maiwalang lattan daytoy. Tapno di mairaman dagiti inosente.

Ngem dina kayat a sawen a no adik ti maysa a tao, basta lattan pagulimeken. Ikkan koma iti panawen nga agbaliw. Ited ti maikadua a gundaway tapno, no kayatna, litupanna dagiti nagkurkuranganna iti gimong ken pamiliana.

Ipokus ketdi koma dagiti lider ti mangpugipog kadagiti dadakkel nga “ikan” iti likudan daytoy a problema ti pagilian. Iti kasta, no matay ti ramut, awan metten ti pagbambanagan ti puon ken dagiti sanga.

Ket awanen ti mabiktima nga agtutubo!

Ita a masursurat daytoy, manarimaan ti pannakaimassayag ni Horacio “Atio” Castillo III a biktima ti hazing.

Fraternity wenno brotherhood ti nagbalin a mitsa ti biagna. Iti kinas am-it ti dila dagiti adda iti likudan dagitoy a grupo, naallukoyda ni agtutubo nga Atio a sumrek kadakuada. Pagdaksanna, nasobraanda ti inaramidda nga inisasion ket nasayang laeng manen ti maysa a biag.

Fraternity, maysa a parikut daytoy kadagiti pagadalan. Mangrugi iti hayskul nga agpang. Kasamayan nga igam ditoy ti panagkakayammet ti komunidad, pagtaengan ken pagadalan tapno mapasardeng daytoy.

Pakamakam: saan pay a nalnalpas daytoy a sinurat, maysa manen nga agtutubo (13 ti tawenna) ti pinaltopaltoganda iti sango ti balayda…

Trese anios, naubing pay. Ipapan pay nga adda pakainaiganna iti maiparit nga agas, ibagatay’ lattan a courier, ngem saan latta a maikanatad nga ipatli lattan. Adu pay ti gundawayna nga agbaliw. Adu pay ti arapaap a maragpatna. Ken maitulong iti pagilian no seknan ti panagbalbaliw.

Masaludsod la ket ngarud, pagturongan, pagbanagan pay ngarud ti pagilian no isuda a namnama daytoy ti agsasaruno metten a maipatli?

Kadagiti imbestigasion a mapaspasamak ita itoy kunkunada nga extra judicial killing wenno EJK, awan ti namnamaen ti tunggal maysa no di rummuar ti kinapudno.

Tapno maisardengen ti pannakairaman dagiti inosente nga agtutubo—isuda a namnama ti pagilian!#

Comments are closed.