Footer

Sinursuran: No Saan Pay a Napessaan…

Kolum ni Jobert M. Pacnis

(Umuna a paset)

NAGMAYAT ti dawa dagiti pagay. Aatiddog ti sar-ayda,” impangas ni Lutting (saanna a pudno a nagan) a kaarrubana. “Saan laeng a kuarenta a sako ti mabagik ita.”

Katulongan ti dati a kaklasena iti elementaria ken hayskul ni Lutting. Dua lawas laengen, mabalinda kanon ti agpagapas.

Immapal dagiti kaarrubana nga agaarimutong iti sirok ti mangga a dati a pagsusugalan dagitoy (ngem insardengdan manipud maiparit daytoy).

Sika man la ngaruden ti sigurado, Lutting, kinunada iti agtawen iti nasurok bassit a kuarenta.

Gapu ta addda pangpangas ni Lutting, permi a timmangar dagiti lapayagna. Kinapudnona, sumagmamano pay laeng a tawen a nagsubli iti barangay a kaduana ti pamiliana.

Nagpaing idi da Lutting iti ili a nakaikamangan ti kabsatda ta nairaman iti riribuk ti amada. Nabayagda sadiay a nakabangonanna payen iti pamiliana. Siam ti tawen ti anakna idi agparangda manen iti lugarda. Tresena itan.

Damagna, nasayaat ti panagbangkag ni Lutting sadiay nagpainganda. Makitaltalon pay. Saanna a maanusan ti sumrek iti konstruksion.

Ngem intugotda latta a sangaamaan ti nakaisigudanda a galad idi addada pay ditoy barioda. Nalaingda latta nga agtiliw iti saanda a taraken a manok.

Gapu kadaytoy a galadda, a napaneknekan ti sibubukel a barangay, napapanaw da Lutting. Kapilitan a nagsublida ditoy bukodda a barangay.

Pinalpaliiwna da Lutting idi makasubli dagitoy. Kas iti sigud, panagmulamula iti bangkag (a napanawanda idi) ti impangrunana a pagsapulan. No panagtatalon, makiraep ken makigapas. Iti panagtutudo, nalaing nga aguong. Rinepreppet ti pailaklakona nga uong.

Idi kuan, nadamagna laengen nga innala ti dati a kaklasena a katulongan ni Lutting iti panagtalon daytoy. Maikaduan a tawen ita.

Nupay katulonganen iti talon, saan a binaybay-an ni Lutting ti panagmulamulana iti bangkag a kukua ti amada. Ngem rumrummuar latta ti siribenda (kas met laeng idi sakbay a pumanawda idi nairaman iti riribuk ti amada) a sangkaamaan. Nalaing latta a mangikisap kadagiti rabong dagiti kawayan dagiti bangkag a madalananna. Agpukaw manen dagiti manok.

Narigat a maipultit ti naitulangen nga aramid, malagipna ti naynay a masagangna a pagsasao.

Ngem sakbay nga agpagapas da Lutting, nagsasaganaden ti panagtudona. No di gubuay ti thunderstorm, dagiti umar-arubayan a nagsasaruno a low pressure area.

Naglagaw ti kaklasena kangrunaan ni Lutting a kasla kasiguraduan a gumatangto kano iti flat TV-da apaman a maalana ti pannakatangdanna a nagtalon. Aglalo idi addadan pinagayan a dineppes ti angin.

Nagsapulda iti aw-awaganda iti combine harvester (a nalatlatak iti awagna a reaper) ta amkenda a maysa kadagiti LPA ti agbalin a bagyo ket dalanenna ti sibubukel a probinsia.

Ngem awan ti nasarakanda a bakante a reaper ta napnon iti nakaikumitan dagitoy a gapasen.

Dimteng ni Odette a bagyo. Nupay saan nga isu ti napigsa, pinagtamed daytoy dagiti pagay. Saanen a mabalin a pa-reaper. Anusanton da Lutting ken ti kaklasena a gapasen dagiti pagayda. Wenno pagapas no addanto pay mayat.

Ngem bassit-usitto laengen ti maapitda!

Pudno la unay ‘tay pagsasao a dimo pay mabalin a bilangen dagiti piek no di pay napessaan dagiti itlog.

Ipamatmat daytoy nga agingga a di iggem iti dakulap, saan pay a makuna a sigurado. Wenno saan pay a kukua ti maysa a banag.

(Adda tuloyna)

Comments are closed.