Footer

Ti Impeachment ni Chief Justice

Salaysay ni Eden A. Alviar

MAIPADANTO ngata ti impeachment case kontra ken ni Chief Justice Maria Lourdes Sereno iti nagbanagan ti kaso daydi sigud a Chief Justic e Renato Corona a napadisi iti akem?

Dua a nagsaruno a kaso ti impeachment case ti naipila kontra ken ni Sereno iti House of Representatives. Immuna a nangipila iti kaso ni Atty. Larry Gadon idi Agosto 30, 2017. Simmaruno met a nagipila ti darum da Volunteers Against Crime and Corruption Founding Chairman Dante Jimenez, ken Vanguard of the Constitution President Eligio Mallari idi Septiembre 4, 2017.

Inakusaran ni Gadon ni Sereno iti kurapsion gapu iti mapapati a saan a mayanatup a panaggastosna iti pondo ti Korte Suprema kas ti panagbiahe iti eroplano iti first class flight, ken panagnaedna kadagiti nangina a siled iti hotel no agbiaheda iti ruar ti pagilian.

Pabpabasolen met da Jimenez ken Mallari ti Chief Justice iti “culpable violation of the constitution” idi nangbukel isuna iti baro a Judiciary Decentralized Office, ken linukatanna ti Regional Court Administration Office sadiay Western Visayas nga awan ti autoridad ti en banc wenno ti sibubukel a Korte Suprema.

Ak-akusaranda pay ni Sereno iti “betrayal of public trust” gapu kadagiti nakaro a panangbaybay-ana iti aplika-sion para kadagiti posision ti Supreme Court deputy clerk of court ken chief attorney, ken dua nga assistant court ddministrator.

Inyendorson iti House of Representatives dagiti 25 a kongresista ti impeachment case nga impila ni Gadon, kabayatan a 16 a kongresista met dagiti nangiduron ti darum da Jimenez ken Mallari, ken manamnama nga umadu pay ti bilang dagiti mangsuporta iti kaso kontra ken ni Sereno.

Impasingked ni House Speaker Pantaleon Alvarez ti pannakaiturong dagiti dua a darum iti Committee on Justice a pakatrataran iti merito ti kaso tapno masinunuo a natibker dagiti ebidensia kontra iti Chief Justice. Pinatalgedanna a makagun-od ti bilang a 98 wenno 1/3 iti kadagupan dagiti amin a kongresista tapno maipadanon ti reklamo iti Senado kas impeachment court a pagpaayanto dagiti senador kas hurado iti darum.

Iti pannakaipila ti impeach-ment case kontra ken ni Sereno ket biningayna manen ti kapanunotan ken pagtaktak-deran dagiti Pilipino. Adda dagiti umanamong iti darum ta mamatida a kas Chief Justice, rumbeng laeng a ni Sereno ket agbalin a paganninawan ti kinalinteg ken modelo iti nasayaat a panangimaton iti Korte Suprema ken dagiti amin a babaenna a korte iti Pilipinas.

Adda met dagiti mamati a napilaan iti impeachment complaint ti Chief Justice kas pang-pressure kenkuana gapu kadagiti panangsuppiatna kadagiti addang ti agdama nga administrasion a mailabsing iti linteg.

Namin-adun a daras a nagkomentario ni Sereno kadagiti gannuat ni Presidente Rodrigo Duterte nangruna kadagiti mapaspasamak a pammapatay iti kampania ti gobierno kontra ti panagraira ti illegal a droga iti pagilian. Ikalkalintegan ti Chief Justice ti pannakasurot ti hustisia ken saan a pannakalabsing ti human rights dagiti umili iti pannakaipakat ti linteg. Kadagiti en banc a desision ti Korte Suprema, nagikeddeng metten ni Sereno maikontra kadagiti kontrobersial nga addang ti Presidente.

Ti pannakaipila ti impeach-ment complaint kontra ken ni Sereno ken ti manamnama a pannakaikkatna iti posisionna ket wagas tapno mapaulimek wenno makontrol ti Korte Suprema ket nawayanton ti administrasion a mangipakat kadagiti gannuatda no kasapulan ti pangngeddeng ti Kangatuan a Korte. Manam-nama a kadagiti nabatbati pay tawen iti termino ni Duterte ket adu dagiti gannuatna a makues-tionaran iti Korte Suprema.

Adda dagiti mamati a naimpluensiaan dagiti nagipila iti impeachment complaint kontra ken ni Sereno. Ngem naglibakan dayta da Gadon, Jimenez ken Mallari. Impasing-kedda a nagdarumda tapno masukatan ti Chief Justice ket masaluadan ti integridad ti Korte Suprema gapu kadagiti ar-aramiden ni Sereno.

Dakkel ti posibilidadna a mayuli ti impeachment case iti Senado ken mabalin pay a makombiktaran wenno maikkat iti posision ni Sereno ta kontrolado ti administrasion ti House of Representatives ken Senado. Agpada da Alvarez ken Senate President Aquilino Pimentel III a kameng ti Partido Demokratiko ng Pilipinas – Lakas ng Bayan (PDP Laban) ken mangidaulo ti super majority iti Kongreso.

Maibilang ti impeachment case kas political exercises a bilang dagiti mangiyendorso a kongresista ken mangngeddeng a senador ti napateg tapno maidarum ken maikkat iti akem ti maireklamo kas ken ni Sereno. Maipalagip nga idi Disiembre 2011, ti kaso daydi naikkat a Chief Justice Corona a nayendorso ti reklamo maikontra kenkuana iti House of Representative babaen kadagiti 188 a kongresista, ken nakedngan a maikkat iti akem uray pay nakurang ti ebidensia a ti nagsentroan ti darum ket ti saan a panna-kairaman dagiti dadduma nga assets-na iti impilana a Statement of Assets and Liabilities and Networks.

Narurod idi ni Presidente Benigno Aquino III ken ni Corona gapu ti panangibi-langna kenkuana a midnight appointee wenno inkamakam nga inapointaran ni Presidente Gloria Macapagal Arroyo idi sakbay a bumaba iti poder. Imbilang ni Aquino a ni Corona ken tubeng iti kam-pania ti administasionna kontra kurapsion.

Nailanad iti 1987 Consti-tution a maikkat iti saad babaen ti impeachment and conviction gapu iti culpable violation of the Constitution, treason, bribery, graft and corruption, other high crimes or betrayal of public trust para ti Presidente, Bise Presidente, dagiti kameng ti Korte Suprema, miembro dagiti Constitutional Commission, ken Ombudsman.

Napateg ti impeachment tapno maikkat iti posision dagiti impeachable officials, ngem maab-abusaren daytoy iti agdama. Kadagiti naglabas a bulan, naidarumen da Duterte, Vice President Leni Robredo. Manamnama ti pannakaidarumto met ni Commission on Elections Chairman Andres Bautista gapu kadagiti alegasion a nagramut iti pammabasol ti asawana nga addaan isuna iti nalimed a kinabaknang nga agarup P1 billion. Adu dagiti napatpateg a trataren ti Kongreso ngem dagiti impeachment kontra kadagiti opisial a rumbeng a maikkan iti prioridad babaen ti panagaramidda kadagiti linteg a mangpadur-as kadagiti umili. #

No comments yet.

Leave a Reply