Footer

Tricycle driver, nagandat ti biagna

CANDON CITY – Nagandat ti biag ti maysa a tricycle driver bayat ti panagdaliasatna sadiay Barangay San Antonio ditoy siudad idi aldaw ti Nobiembre 3.

Naitaray iti Saint Martin de Porres Hospital para iti pannakaagas dagiti sugatna iti likud ken tengngedna ni Edmond Mina y Gacusan, 36, naasawaan, ken residente iti Barangay San Agustin ditoy met laeng siudad.

Kinuna ni Gerald Briones y Hernandez, 52, ken residente iti Brgy. San Antonio, Candon City, a nakangeg iti dua a kanalbuong ket nakitana ti traysikel ni Mina a nangdungpar iti kongkreto a diding ken poste ti elektrisidad iti sanguanan ti Candon Funeraria. Intaray ni Briones ti biktima iti ospital.

Kinuna met ti biktima a malaksid a nagaruat iti helmet ti maysa kadagiti suspek, awanen ti pakabigbiganna kadakuada.

Naglibas dagiti suspek iti abagatan a direksion a nakalugan iti motorsiklo ket isuda ti puntiria ti manhunt operation nga inwayat dagiti polis.

Segun iti polis, bayat ti panagdaliasat ti traysikel ni Mina nga agpaabagatan iti 25 de Marzo Street, inabay dagiti suspek a nagkalugan iti di ammo ti klasena a motorsiklo ket maysa kadakuada ti nangpaltog iti biktima iti namindua a beses.

Nakarekobre dagiti kameng ti SOCO iti dua a buli manipud iti di ammo ti kalibrena a paltog iti nakapasamakan ti krimen.

Di pay ammo ti motibo ti pannakagandat ti biag ni Mina.

Kinuna dagiti polis a saan a nakalista ti biktima kadagiti drug surrenderee ti Candon City. (Tawid News)

Comments are closed.