Footer

BANNER: Ballaag ti PhilHealth iti publiko: Agannad iti phone scam.

ILOCOS SUR – Agannad kadagiti tawag iti selpon manipud kadagiti di am-ammo a tattao nga agpammarang a nangato nga opisial iti ahensia a mangallilaw kadagiti tattao, daytoy ti ballaag a naggapu manipud iti maysa nga opisial ti Philippine Health Insurance Corporation ((PhilHealth) iti Ilocos itay nabiit.
Kinuna ni Atty. Rodolfo Del Rosario, Jr., officer-in-charge Regional Vice President of PhilHealth-Regional Office I, nga adda dagiti di am-ammo a tattao a mangar-aramat iti selpon nga agdawdawat iti pabor, tulong pinansial wenno dadduma pay a kita ti solisitasion kas iti kiddaw para iti load iti selpon wenno agbirbirok iti caterer a matangdanan iti panagpasken.
Kinuna ni Del Rosario a dimmanon iti atensionda dagitoy nga insidente a napadasan dagiti satellite offices-da iti Candon City, Ilocos Sur ken iti San Carlos City, Pangasinan; dagiti lokal nga opisina ti health insurance iti Ilocos Sur ken Ilocos Norte; ken dadduma pay a PhilHealth offices iti sapasap a pagilian.
Kiniddaw ni Del Rosario iti publiko ti panangballaagda iti pamiliada, kakabagian, gagayyem ken am-ammo a maikaniwas dagitoy nga aramid ken saan nga autorisado ti PhilHealth.
Indagadag ti opisial iti publiko a no makapadasda kadagiti kastoy nga aramid, ireportda laeng iti PhilHealth-Regional Office I wenno komontakda iti (075) 515-6237, ?515-3333 loc. 4132 wenno ag-e-mail iti [email protected] (Tawid News/Manipud iti report ni April M. Montes-Bravo)