Footer

Drug surrenderee, binagsolna ti ulitegna

SANTA, Ilocos Sur – Dati a susik ti mapapati a nakagapu ti panangbagsol ti maysa a drug surrenderee iti ulitegna idi rabii ti Nobiembre 5 sadiay Barangay Mabilbila Sur ditoy nga ili.

Segun iti polis, napasamak ti panangbagsol ni Marlon Molina y Bista, 36, baro, drug surrenderee, iti ulitegna a ni Rolly Molina y Baldos, 53, naasawaan, trabahador bayat ti panaggawid ti suspek ken kakabsatna a naggapu iti drinking spree iti Melaya’s residence iti dayta a rabii.

Naggawid da Marlon ken kakabsatna a Mariano ken Michael gapu iti mapapati a nakaro a panangkusilap ni Rolly kadakuada idi aggiinomda.

Mapapati a sinurot ni Rolly, kaduana ti maysa a Narding Betita, dagiti agkakabsat idi aggawidda ket nagtaray dagitoy ngem natengngel ni Rolly ni Mariano sana dinisnog.

Nagsubli ni Marlon idi nakitana a pinanggep ti ulitegna a bagsolen ti kabsatna a Mariano ket nabaelanna a naagaw ti imuko sana imbagsol iti ulitegna iti sumagmamano a beses a nakasugatan ti nadumaduma a paset ti bagi ti biktima.

Intaray dagiti nagresponde a polis ni Rolly iti Ilocos Sur District Hospital, Narvacan ngem indeklara ni Dr. Bernadeth Tadeo a dead on arrival.

Naaresto ti suspek ken narekobre ti imuko nga agatiddog iti sumurok-kumurang 8 walo pulgada agraman ti putanna.

Iti kaudian a report, naipaiman iti opisina ti provincial prosecutor ti rekord ti inbestigasion kanaig ti kaso a homisidio maikontra ken ni Marlon Molina y Bista, ken Michael Molina y Bista.#

Comments are closed.