Footer

3 motorista a natay iti aksidente, awan aruatda a helmet: polis

CANDON CITY – Awan ti aruat a helmet dagiti natay a motorista idi nainbolbarda iti aksidente itay nabiit.
Daytoy ti limtuad iti pana-gimbestiga dagiti polis mainaig kadagiti tallo a nagsisina nga aksidente a napasamak iti Vigan City ken ditoy siudad manipud Nobiembre 15 aging-ga iti 17.
Kas maibatay iti journal ti kapolisan, idi naaksidenteda a puon ti nakatayanda, awan ti helmet nga aruat ni Joel Galaites y Madriaga, 28, mannalon; Kevin Reniva y Cello, 22, baro, residente iti Barangay VII, Vigan Cty; ken Dareen Galangco y Barlongo, 17, estudiante, ken residente iti Brgy. Sacaang, Galimuyod, Ilocos Sur.
Napasamak ti aksidente a nakatayan ni Galaites idi agarup 9:50 ti rabii ti Nobiem-bre 15.
Segun iti polis, agpada nga agpalaud a direksion ti Honda TMX nga addaan sidecar a minaneho ni Galaites, ken ti Kawasaki Fury a minaneho ni Viesta, kasakayna ni Venus Lojo Madarang, 17, awanan asawa, helper.
Mapapati a pinadas a labsan ti Honda TMX ti Kawasaki Fury ngem nasapgid ti sidecar ti makannawan a paset ti motorsiklo.
Gapu iti daytoy, dinungpar ti Honda ti driftwood iti amianan nga abaga ti kalsada a nakadunoran ni Galaites kadagiti nadumaduma a paset ti bagina.
Naitaray ni Galaites iti St. Martin de Porres Hospital ngem naideklara a dead on arrival.
Nadunor met da Viesta ken ni Lojo ket naitarayda iti Candon City Hospital para iti pannakaagasda.
Rimmuar ti inbestigasion a malaksid a nakainom ni Viesta ken awan aruatna a helmet, agpadada ken ni Galaites nga awan ti lisensiada idi napa-samak ti aksidente.
Iti aksidente a nakatayan ni Reniva, awan la ngaruden ti lisensiana nga agmaneho iti motorsiklo, ken awan helmet-na, mapapati a napakaskas pay isu a nadungparna ti poste ti elektrisidad iti abagatan nga abaga ti kalsada ti Burgos sadiay Barangay IV, Vigan City idi agarup 9:15 ti rabii ti Nobiembre 16.
Nupay naitaray ni Reniva iti St. James Hospital, indeklara ti doktor a nangtaming kenkuana nga awanen ti biagna a nai-danon iti balay-pagagasan.
Kabayatanna, rimmuar iti inisial a panagimbestiga dagiti polis a napasamak ti aksidente a nakainbolbaran ni Galangco iti Candon-Salcedo-del Pilar road, partikular iti bisinidad ti Bagani Gabor, Candon City idi agarup 11:55 ti rabii ti Nobiembre 17.
Mapapati a nataray ti motorsiklo ni Galangco ket napukawna ti kontrolna iti luganiti pagpikuran iti nada-kamat a kalsada a nagresulta iti ikakautna iti amianan a linia ken dimmungparanna iti plant box.
Gapu iti pigsa ti impact, naipalladaw ni Galangco ket naitupa ti ulona iti poste ti maysa a kompania ti komunikasion.
Awanen ti biag ni Galangco idi maidanon iti Rasonable Hospital.
Segun iti polis, awan ti helmet ni Galangco idi maaksidente. (Tawid News)

Comments are closed.