Footer

Barito, nagbekkel

LIDLIDDA, Ilocos Sur – Tunggal makainom iti arak ken agsubangda nga agama, sangkaballaag daytoy barito a patayenna ti bagina. Kasta met laengen ti inaramidna idi agsubangda nga agma idi rabii ti Nobiembre 15. Ngem saan a ninamnama ti amana nga iti dayta a rabii, tungpalen ti barito ti ballaagna.

Idi agsapa ti Nobiembre 16, natakuatan ti ina a saan a naggawid iti nagpatnag ti anakna a ni Joshua Castor y Villanueva, 17, ket pinabirokna iti lakayna a ni Domingo.

Nasarakan laengen ti lakay a nakabitin babaen ti cable wire ti anakna iti sanga ti salamagi iti asideg ti balayda.

Segun ken ni Castor, iti dayta a rabii, nagsubangda manen nga agama ket imballaag ti biktima: “No hanka mapatay, siak ti mangpatay iti bagik,” sa pimmanaw.

Idi addan iti likud ti balayda, impukkaw kano pay ni Joshua: “Umunaakon, papa!” ngem saan nga intaltalek ti lakay.

Segun iti panagimbestiga dagiti polis, panagimon ti barito kadagiti dadduma a kakabsatna ti mapapati a nagbekkelenna. (Tawid News)