Footer

3 lugan nainbolbar iti aksidente, menor de edad, DOA iti ospital

STA. LUCIA, Ilocos Sur – Naideklara nga awanen ti biag ti maysa a menor de edad iti nakaitarayanna nga ospital kalpasan a nainbolbar ti luganna iti aksidente iti national highway a sakup ti Barangay Sabuanan ditoy nga ili idi malem ti Nobiembre 23.
Intaray dagiti nagresponde a polis ni Nel Engelbert Tabing y Gabuat, 16, awanan asawa, Grade 11 student iti Theodoro Hernaez National High School, ken residente iti nadakamat a barangay para iti madagdagus a pannakataming dagiti dunorna ngem indeklara ti doktor a natayen.
Segun iti report, tallo a lugan ti nainbolbar iti nasao nga aksidente a pakaibilangan ti Nissan Caliber Pick-up a minaneho ni Dodie Bermudez y Ramirez, 32, awanan asawa, residente iti Barangay Poblacion Central, Sison, Pangasinan; Isuzu Forward truck a minaneho ni Edward Jaramillo y Garcillano, 23, single, drayber ti FNDC Cooperative ken residente iti San Nicolas, Candon City; ken ti Honda Wave 110 a minaneho ni Tabing.
Iti panagimbestiga dagiti polis, agpaabagatan a direksion ti Nissan Callibre pick-up ken ti Honda Wave 110 ngem iti lugar a nakapasamakan ti aksidente, pinadas a liklikan ti pick-up ti maysa a PUV van a nagpidut iti pasahero.
Iti dayta met a kanito, pinadas ti motorsiklo nga obertekan ti Nissan pick-up ngem simmungad ti Isuzu Forward truck a naggapu iti bangir a linia ket nupay liniklikan ni Tabing, nadungparna ti kutit ti lugan iti paset ti nagtugawan ti drayber.
Gapu itoy, naturong ti motorsiklo ti linia ti Isuzu truck ket nagdinnungparda a puon ti panagsagrap ni Tabing kadagiti nakaro a dunor iti ulona ken sugat iti nadumaduma a paset ti bagina a nagresulta iti pannakatayna.
Saan a naan-ano ti drayber ti forward truck ken ti Nissan pick-up. (Tawid News)