Footer

BANNER: P11.4-M pategna pinuon marihuana, fruiting tops, pinuoran ti PDEA operatives

SUGPON, Ilocos Sur – Nasurok laeng a makabulan kalpasan a naipabaklay iti PDEA kas sole agency iti gubat kontra droga, nakaeskor dagiti tropa daytoy nga ahensia iti Rehion 1 ken Cordillera kalpasan a nagballigi ti operasionda a marijuana eradication iti beddeng ti Benguet ken Ilocos Sur idi agsapa ti Nobiembre 20.
Mapattapatta nga agbalor iti P5,224,800.00 million ti pategna dagiti pinuon ti marihuana a pinag-ot ken pinuoran ti nagtipon a tropa ti PDEA RO-1 ken PDEA-CAR iti Mt. Baukok ken Mt. Natiktikan, mapagsupsupiatan a pagbeddengan ti Kibungan, Benguet ken Sugpon, Ilocos Sur.
Agbalor met iti mapattapatta a P6,250,000.00 ti 50,000 grams a marijuana dried stalks ken fruiting tops a naduktalanda iti pito a plantasion iti nadakamat a nasulinek a lugar.
Nagpaay dagiti personnel ti Sugpon police station, RPSB-1 ken RID-1 a katulongan iti seguridad dagiti tropa ti PDEA-RO1 ken PDEA-CAR bayat ti pannakaiwayat ti marijuana eradication.
Sakbayna, iti maysa a memorandum a napirmaan idi Oktubre 10, imbilin ni Presidente Rodrigo R. Duterte kadagiti amin a lawenforcement agencies, a pakaibilangan ti PNP kasta met amin nga “ad hoc task forces” a bay-anda ti PDEA kas “sole agency” a mangiwayat kadagiti kampania ken operasion kontra illegal a droga.
Imbilin daytoy ti Presidente maigapu ti dumakdakkel a pammabalaw a sinagrap ti PNP kanaig dagiti drug-related killings.
Ngem iti panagbitlana iti sanguanan dagiti tropa ti Army itay nabiit, kinuna ni Duterte a kayatna man wenno saan, isublina ti bileg iti PNP agsipud ta di pagduaduaan, umadu ti aktibidad iti droga.
Kabayatanna, kinuna ni PDEA spokesperson Derrick Carreon a tagtagiurayda ti panagsubli ti PNP iti kampania maikontra iti droga.
Inannugot ti PDEA a kurang ti tao, pondo, ken ekuipona ket “kasapulan dagiti dadduma nga ahensia a mangtagtagiben iti linteg partikular ti PNP”. (Tawid News)

Comments are closed.