Footer

Motorista, ginudas suspek nagkalubbon iti motorsiklo

CAOAYAN, Ilocos Sur – Sumagmamano nga aldaw kalpasan ti pannakapasamakna, awan pay ti suspek iti pammaltog a naiwayat iti national road a sakup ti Barangay Naguilian, Caoayan idi malem ti Nobiembre 22.
Nupay kasta, agtultuloy ti panagimbestiga dagiti polis ditoy para iti pannakasolbar ti nasao a pammaltog a nakatayan ni Danilo Osalvo y Pila, 54, naasawaan, ken residente iti Barangay Cabaroan Daya, Vigan City.
Indeklara ni Dr. Leilanie dela Cuadra ti Vigan City Health Office a dead on the spot ni Osalvo gapu kadagiti grabe a sugatna iti ulo ken makannawan a luppona.
Nagsagrap kadagiti garadgad iti rupa ken kannigid a sakana ti kinasakay ni Osalvo iti motorsiklona a ni Allan Fabillaran y Pacis, 34, awanan asawa, ken residente met laeng iti Barangay Cabaroan Daya.
Segun iti inisial a panagimbestiga dagiti polis, idi agarup 4:05 ti malem ti nadakamat a petsa, agdaldaliasat iti national road ti Barangay Naguilian ti nalabaga a Euro motorcycle a minaneho ni Osalvo idi manipud iti likudan, pinaputokan dagiti di nabigbig a suspek a naglugan iti di ammo ti klasena a motorsiklo ken nakaaruat iti helmet a nakatiruan ti ulo ken makannawan a luppo ni Osalvo a nakatayanna a dagus.
Nupay naikras ti luganda, nakataray nga immadayo ni Fabillaran. Naglibas met dagiti suspek iti saan nga ammo a direksion.
Mapapati a cal. 45 ti naaramat iti pammaltog kas maibatay iti uppat a kapsula ken maysa a deformed slug ti nadakamat a paltog a narekobre ti SOCO team manipud iti ISPPO iti crime scene.
Iti pannakaisurat daytoy, di pay ammo ti motibo ti pammapatay. (Tawid News)