Footer

BANNER: 6 mapukpukaw a mangngalap, naalaw agkatangkatang iti baybay

CABUGAO, Ilocos Sur -Naalaw iti kabaybayan a sakup daytoy nga ili ti tallo pay kadagiti innem a mangngalap a taga-Gabao, Santiago, Ilocos Sur a naireport a mapukpukaw manipud idi agsapa ti Nobiembre 1.

Agarup 7:30 ti bigat ti Nobiembre 2, impakaammo ti Cabugao Police Station a naalaw dagiti lokal a mangngalap ti tallo a lalaki nga agkatangkatang a nakakapet iti paset ti napattog a bangkada iti kabaybayan a sakup daytoy nga ili.

Innaganan dagiti polis dagiti naalaw a mangngalap a da Rey Etrata y Martinez, 35; Bryan Cuaresma y Bajet, 29; ken Alejandro Escalona Jr. y Calica, 49, residenteda amin iti Barangay Gabao, Santiago.

Dagus a nagturong iti Cabugao dagiti polis ti Santiago, rescue team ti MDRRMC, Santiago, ken pamilia dagiti naalaw a mangngalap tapno iyawidda dagitoy.

Immun-una ngem daytoy, idi agarup 3:00 ti malem ti Nobiembre 1, tallo a mangngalap a taga-Gabao met laeng ti inalaw ti limmabas a cargo vessel, M/V Kerrisdale, nga agkatangkatang iti kabaybayan, a nakakapet iti paset ti napattog a bangkada.

Agpa-Incheon, South Korea ti cargo vessel idi nasalamaanna dagiti agtaptapaw a mangngalap a pakaibilangan da Nilo Etrata y Lacaden, 35; Norlex Bragado y Claro, 35; ken Jun Collo y Etrata, 33.

Kalpasan a napakaammuan ni Ernesto B. Caballero, kapitan ti nasao a cargo vessel, dagiti autoridad, inkeddengna ti panangisublina dagiti naalaw a mangngalap iti kabaybayan a sakup ti Santiago no sadino nga inallawat ti PDRRMC ken nagdalanda iti check-up sada naisubli kadagiti pamiliada.

Maipalagip a timmapog dagiti innem a mangngalap a naglugan iti dua a bangka idi Oktubre 31 ngem saanda a nakasubli idi agsapa ti Nobiembre 1.

Kinuna ti maysa a kalugaran dagiti naitawtaw a mangngalap ken kagiddan dagiti biktima a timmapog iti baybay nga inkeddengda ti timmakdang a nasapa idi napaliiwda a dumakdakkel dagiti dalluyon.

Mapapati a sinabuagan ti dakkel a dalluyon ti bangka ti naudi a grupo dagiti naalaw a mangngalap a puon ti nakapattoganna ken nakadadaelan ti makinana ket naiyanud dagitoy agingga iti kabaybayan a sakup ti Cabugao. (Tawid News)

No comments yet.

Leave a Reply