Footer

EDITORIAL: Agpapada a Sueldo ken Benepisio Dagiti Mangmangged

AGPAPADA dagiti Pilipino nga agbaybayad iti buis ken adu dagiti paggastosanda, ngem apay a maudi unayen dagiti agtatrabaho iti pribado a sektor iti pannakaingato ti sueldo ken pannakaipaay dagiti benepisio no maidilig kadagiti agserserbi iti gobierno?
Dayta ti sentimiento dagiti adu nga agserserbi iti pribado a sektor a kaaduanna ket bassit dagiti matgedan ken benepisio nga aw-awatenda no maikompara kadagiti opisial ken regular nga agpapaay iti gobierno nangruna dagiti nabutosan nga opisial ken agserserbi kadagiti dadakkel a Government Owned and Controlled Corporations, ken dagiti unipormado nga agserserbi iti Philippine National Police ken Armed Forces of the Philippines.
Saan a masinunuo ti kadakkel ti sueldo ken kaadu ti benepisio dagiti dadduma nga opisial ti gobierno nangruna kadagiti nangato ti saadna nga agpapaay kadagiti GOCC. Uray no addan “Salary Standardization” ken adda kaibatogan a “Salary Grade” ti amin nga agserserbi ti gobierno agraman ni Presidente Rodrigo Duterte agpababa ta adu dagiti nalimed a perks wenno pribilehio a sagsagrapenda a saan a mairakrakurak iti publiko.
Rinuk-atanen ti Department of Budget Management ti P32.84 billion a pondo para iti 14th month pay bonus a katukad ti basic salary ken P5,000 cash gift kadagiti agarup 1.38 million nga agserserbi iti gobierno iti saan a nasapsapa ngem idi Nobiembre 15, 2017. Immunan a naawat dagiti agpapaay ti gobierno ti 13th month pay-da idi Mayo sakbay ti panangrugi ti klase kadagiti pagadalan kas tulong kadagiti adda pagbasaenna.
Adayo pay ti Paskua ngem umawaten dagiti taga-gobierno kadagiti bonusda. Inton masanguanan ti Paskua, addanto pay dagiti ahensia ken GOCC a mangipaay iti sabali nga insentibo kadagiti personnel-da.
Awan ti dakesna no maipaayan ti nangato a sueldo ken benepisio dagiti agserserbi iti gobierno nangruna koma no dagiti nababa ti saadna ta kasapulanda met dayta tapno maisakad ken maipaayanda iti nasaysayaat a kasasaad dagiti pamiliada. Ngem sadino ti pagtaudan ti pondo ti gobierno? Saan kadi nga iti buis dagiti umili? Saan ngarud koma a dagiti agbaybayad iti buis ket agpapadada met a mabenepisiaran no ania man ti pagsayaatan nga ipaay ti gobierno?
Adda dagiti opisial ken agserserbi iti gobierno ti agkuna a nababa ti sueldoda ken limitado ti benepisioda, isu a mapilitanda nga agaramid iti maikaniwas iti linteg kas ti panagkusit, panagkunniber ken kurapsion. Sabali pay dagiti adda pakainaiganna kadagiti krimen ken illegal nga aktibidad.
Nababa kano ti sueldo ken bassit ti benepisioda ken saan nga umanay a pangsuportada iti pamiliada. Dayta ti rason dagiti sumagmamano a polis a nainanaig kadagiti illegal nga aramid kas ti illegal drug trade, kidnap-for-ransom, carnapping ken dadduma pay a krimen. Ngem nababa kadi ti total monthly compensation nga agaup P20,000 para iti Police Officer I wenno kababaan a polis? Adu ketdi dagiti bisio ken kapritsoda isu a saanda a mayanay ti sueldoda.
Impasingkeden ni Presidente Duterte ti pannakadoble ti sueldo dagiti polis ken soldado nga addaan iti nababbaba a rangko. Pinatalgedan metten ni DBM Secretary Benjamin Diokno nga addan pangalaanda iti pondo para ti pannakaingato ti sueldoda. Maisarsarunonto metten ti pannakaingato ti sueldo dagiti agserserbi kadagiti unipormado ken naarmasan nga ahensia ti gobierno. Apay ngata a maipangpangruna dagitoy nga armado nga agpapaay iti gobierno?
Iti pakaseknan met dagiti agserserbi iti pribado a sektor nga ad-aduda nga amang ngem dagiti agserserbi iti gobierno, nakakaasi ti kasasaadda ta kaaduanna kadakuada ti mangibenbennat ti bassit a masapulanda, ken agan-anus kadagiti benepisio a maipapaay kadakuada.
Pudno a nasayaat met ti sueldo ken adu dagiti benepisio dagiti nangato ti saadna nga agpapaay kadagiti pribado a kompania nangruna kadagiti dadakkel wenno multi-national a korporasion, ngem sumagmamanoda laeng no maidilig kadagiti minilion nga ordinario a mangmangged nga umaw-awat iti nababa a sueldo ken limitado a benepisio.
Adu kadagiti agpapaay kadagiti pribado a kompania ti umaw-awat iti sueldo a nababbaba pay ngem ti minimum wage nga intuyang ti Department of Labor and Employment. Adu kadakuada dagiti awanan ti benepisio kas ti pannakaimiembroda iti Philippine Health Insurance tapno adda met koma pagsammakedanda no agsakitda ken dagiti kameng ti pamiliada. Adu pay laeng dagiti saan a miembro ti PAG-IBIG ken Social Security System tapno nataltalgedto met koma ti masakbayanda inton agretiro ken agsalogen ti pigsada.
Iti laksid ti kari ni Duterte idi panawen ti kampania a pasayaatenna ti kasasaad dagiti mangmangged iti pribado a sektor, agtultuloy met latta ti contractualization ken panagdalan iti on the job training iti nakurang a lima a bulan tapno dagiti mangmangged kadagiti pribado a kompania ket saanda a maikkan iti umno a sueldo ken dagiti benepisio nga inyetnag ti linteg. Ngem ania ti ar-aramiden ti DOLE kadagiti aglabsing iti Labor Code nga anti-labor practices nga isaysayangkat dagiti dadduma a pribado a kompania?
Ayannan ti kari ni Duterte idi panawen ti kampania a mangpasayaat ti kasasaad dagiti amin a mangmangged? Saan laeng koma a dagiti agserserbi iti gobierno nangruna dagiti polis ken soldado ti ipampamaysana a pasayaaten ti kasasaadda yantangay nangaton ti sueldo ken adun dagiti benepisioda.
Idi idadateng ti Paskua, kabayatan nga agragrag-o dagiti agpapaay iti gobierno gapu kadagiti nayon a benepisio ken bonus, adu a mangmangged iti pribado a sektor dagiti bassit wenno awanan iti 13th month pay wenno cash gift nga awatenda. Kasakitan, adunto kadagiti contractual a mangmangged dagiti maawanan iti trabaho no aggibusen dagiti kontratada. (Eden A. Alviar)

Comments are closed.