Footer

EDITORIAL: Pannakawayawaya ti Marawi City kadagiti Terorista

ANIA ti adal nga imbati ti nadara a riribuk sadiay Marawi City kadagiti Pilipino nangruna kadagiti agserserbi ken opisial ti gobierno?

Nagrag-o dagiti umili a naayat iti kappia iti panaggibusen ti gubat sadiay Marawi City kalpasan ti 153 nga aldaw a nadara a ranget iti nagbaetan dagiti tropa ti gobierno ken dagiti terorista a mangid-idolo iti mapagbutbutngan nga Islamic State of Iraq and Syria group.

Indeklaran ni National Defense Secretary Delfin Lorenzana idi Oktobre 23, 2017, eksakto a lima a bulan idi nangrugi ti riribuk sadiay Marawi City idi Mayo 23, 2017, a naggibusen ti gubat iti Islamic City ken nawayawayaanen iti tengngel dagiti terorista kalpasan a napapatay dagiti naudi a grupo a nagkuta iti maysa a pasdek. Mairaman kadagiti napapatay ket dagiti ganggannaet a terorista, ken assawa ken annak dagiti napapatay a lider ti ISIS-inspired group a kinaykayatda ti natay a nakiranget ngem ti simmuko kadagiti soldado a nangparmek kadakuada.

Makalawas sakbayna, immunan nga imploklamar ni Presidente Rodrigo Duterte a napaksiaten dagiti terorista iti Marawi City kalpasan a napapatay dagiti liderda a da Isnilon Hapilon, nabigbig nga Emir ti ISIS iti South East Asia, ken Omarkhayan Maute, lider ti Maute Group, kabayatan ti panaglibasda. Naisaruno a napapatay ni Dr. Mahmud Ahmad, ti Malaysian a financier ti Marawi Siege.

Uray nalpasen ti gubat sadiay Marawi City, saan pay a mapalubosan dagiti pimmanaw nga agindeg kadagiti pagtaenganda ta saan pay a natalged ti siudad. Madaman ti panagdalus dagiti soldado iti siudad kadagiti nakalemmeng a palab-og ken bomba nga Improvised Explosives Devices nga inkapet dagiti terorista kabayatan ti riribuk.

Iti panagleppas ti riribuk sadiay Marawi City, mapadayawan kas maingel ken bannuar dagiti soldado, polis ken sibilian a nakikaysa iti pannakagun-od ti kappia ken pannakaisalakan dagiti adu nga inosente a tattao a naipit iti gubat. Mabigbig a martir dagiti nagibuis ti biagda tapno agari ti kappia ken maisalakan dagiti awanan-gaway a biktima ti gerra.

Nadamsak ti gubat iti Marawi City ta iti laeng las-ud ti lima bulan a riribuk ket dinuprakna ti nakadurdur-as a siudad. Nadadael dagiti adu a pasdek pakairamanan dagiti simbaan dagiti Kristiano ken mosque dagiti Muslim a nabangon iti nabayag a panawen.

Ti nagbanagan ti Marawi City ket ipakitana ti kinapeggad ti naballikog a pammati dagiti terorista a ti makigubat kadagiti ibilangda a kabusor ken mangliliput iti pammatida ken matay para iti bigbigbigenda a Dios ket mangiturong kadakuada iti agnanayon a paraiso. Ipaneknek daytoy ti kaadu dagiti naallilaw ken naallukoy a terorista a kimmappeng iti tignay a nagpakamatay iti palso a pammatida.

Ti pannakaisayangkat ti terorismo iti Marawi City ket ipaneknekna ti nakaro a panagliway dagiti umili iti siudad nangruna dagiti agpapaay kadagiti ahensia a pakaseknan ti seguridad. Saan koma a nagtinnag iti nadara a riribuk ti pagteng no nagridam dagiti umili nangruna dagiti polis, soldado ken opisial ti lokal a gobierno tapno nasiimanda ti panggep dagiti terorista. Nabayag a sinaganaan dagiti terorista ti panangsakupda iti Marawi City gapu iti kaadu dagiti urnongda a nabileg nga armas, bala ken eksplosibo ta nagpautda a makirangranget iti lima a bulan.

Kayariganna ti nagkampeon iti torneo ti ragsak dagiti soldado ken polis iti panangpaksiatda kadagiti terorista nga agdagup iti 919 a napapatay. Katukad dayta ti 165 a biag nga imbuis dagiti soldado ken polis, ken dagiti 47 nga inosente a sibilian a napasag iti naranggas a gubat. Nagballigi man dagiti soldado ken polis nangpadso kadagiti terorista. Ngem naabak ken lugi latta ti gobierno ken dagiti Pilipino.

Sino ti napukawan kadagiti billion ti pategna a nadadael nga imprastraktura? Mano ti nausar a pondo ti gobierno kadagiti armas, bala, bomba, ken eksplosibosar? Mano ti nagastos kadagiti lugan, barko ken eroplano a nausar iti gubat? Mano a million wenno billion a pisos ti balor dagiti naited a tulong kadagiti evacuees? Manonto ti mausar tapno masimpa ti nadadael a siudad? Manonto ti magastos nga ited a benepisio ken pension para kadagiti natay ken nabaldado a soldado? Dagiti magastos ket ipaay ti gobierno a nagtaud iti tulong ken buis dagiti tattao. Pondo a maipaay koma sapasap a tulong kadagiti Pilipino.

Iti panagturay ti kappia sadiay Marawi City, imbatina ti naindaklan a leksion kadagiti Pilipino a kanayon nga agridam iti pangta ti terorismo, ken agtignayda a mangpaksiat iti amin a kita ti kinadamsak ta dayta ket mailabsing iti linteg ti tao ken kangrunaanna iti Dios. (Eden A. Alviar)

No comments yet.

Leave a Reply