Footer

Sinursuran: No Saan Pay a Napessaan…

Kolum ni Jobert M. Pacnis

(Maudi a paset)

Pudno la unay ‘tay pagsasao a dimo pay mabalin a bilangen dagiti piek no di pay napessaan dagiti itlog.

Ipamatmat daytoy nga agingga a di iggem iti dakulap, saan pay a makuna a sigurado. Wenno saan pay a kukua ti maysa a banag.

Isubom la ngaruden, matippay pay laeng, kunada pay ita.

Ken ‘tay pagsasao dagitay Anggalog a ‘pera na, naging bato pa’.

Maipalagip kenkuana ti nabiit pay nga impabuyada a dokumentario iti telebision. Maysa nga anak ti nakasapul iti rineppet a kuarta iti bolsa ti siortpant a naipalaon iti plastic container. Kalpasan dayta ti layus ket agdaldalusda iti pagtaenganda.

Impakita ti anak ti kuarta iti inana. Kasta unay ti ragsak ni nanangna. Ad-adda manen a di mailadawan ti ragsak ni tatangna a masaksakit idi makitana ti pirak. Isu gayam daytoy ti nabayagen a sapsapulenna a gastuen para iti panagpaagasna.

Nagtaud ti agarup sangagasut a ribu a pisos a kuarta iti dati nga amo ti amana a maysa a doktor. Panagyaman ti doktor iti agarup tallo a dekada a panagbalin ti amana a kas drayber daytoy.

Yanna nga adat, gapu ta nalimed ti amana, saanna nga imbagbaga iti pamiliada nga adda naawatna a kasta a gatad. Induldulinna ta naimbagto laeng nga usarenda iti masanguanan.

Pagdaksanna, iti panaglabas dagiti tawen, nalipatan ti amana no nangisuksokanna iti kuarta.

Isu a kasta la unayen ti ragsak ti ama idi masarakan ti anakna ti kuarta. Nakaluasit pay. Adda met laengen pagpaagasna!

Ngem nalpay ti abagada a sangapamilia idi naammuanda a saanen a mabalin a gastuen dagiti rineppet a kuarta. Na-demonitized gayamen dagitoy. Awanen ti pategda.

Pera na, naging bato pa, kas kunada.

Maysa a banag ti naadalna kadagita a situasion. Ti biag, saan met a sigurado.

Kayatna a sawen, dina ammo no kaano maibabawi ti angesna. Awan iti edad dayta.

Aglalo ita a kanigid-kanawan ti biktima dagiti pammapatay a mainaig iti kampania kontra iti maiparit nga agas.

Nupay ammona a nadalus ti konsensiana kadayta a banag, namak payen no adda napagurana wenno umapal kenkuana ket ipulongda a maysa a pusher wenno user?

Wenno mapagbiddutan?

Maam-amak, aklonenna dayta. No idi, iti laeng Kamaynilaan ti pakadamdamaganna kadagita matoktokhang. Ita, mapaspasamaken iti aglawlawna. Kayatna a sawen, uray iti kasulinekan, nakadanonen dagiti ima a mangdalus iti kagimongan.

Nasagangna iti social media, kabayatan kano a sibibiagka pay, ipennekmon ti agragsak, manganka kadagiti agkakaimas, a kasla ‘tay maudi nga aldawmon ditoy lubong.

Ta dimo kano ammo no kaano a kawitennaka ni Patay.

Wenno no kaano a mapagkamaliandaka a pusher wenno user!

Ngem sabali ti simmeksek iti isipna. Agbiag a kasla ‘tay maudi nga aldawna. Ngarud, annongenna latta dagiti naipakumit a trabahona. Saanna a laokan iti kalokoan. Liklikanna ti manggundaway iti padana a tao.

Agbiag iti kinasimple. Saanna a gamden ti daras a pumallangatok ngem iti met kinikillo a wagas.

Ti la ngarud mabalin nga aramidenna, kumarapet iti Dios. Italek Kenkuana ti inaldaw a panagbiag. Agkiddaw iti tulongna ta isu ti mangted kadagiti naruay a kasapulan ken pannalaknib.

Iti kaso ni Lutting ken ti kaklasena, ken uray payen dagiti kapatadanda a mannalon, saanda ngata a nagkurang ket panangkalbit kadakuada ti didigra a simmangbay?

Maysa ngamin itan a kinapudno a saanen a ngilngilinen dagiti mananlon ti Aldaw ti Panaginana ken Panagdaydayaw. Addada latta kadagiti kataltalonan nga agkuditkudit. Nalipatandan ti obligasionda iti Namarsua.

Isu nga inkeddengna nga itaklinna amin iti Dios ti aramidna. Ta inton agbilang met iti piek, sigurado ti bilangna!#

No comments yet.

Leave a Reply