Footer

TI NAITULONG TI KINAMANNURATKO ITI PAMILIAK

Sinurat ni Salvador A. Espejo

Dakkel ti naitulong ti panagsursuratko iti panaglupos ti pamiliak. Uray ita, diak pay indulin ti plumak, no adda wayak, agputarak latta iti sarita wenno salaysay iti binangonko a pagiwarnak, ti Tawid News Magazine. Malaksid iti matgedak iti panangimatongko iti TNM, saan a magatadan ti umukuok a pannakapnek iti kaunggak tunggal maipaw-itko iti imprenta ti kaudian nga isyo ti nanumo a pagiwarnaktayo.

Dakkel ti naitulong ti kinamannuratko iti panangisakadko iti panagadal dagiti dua nga anakmi: ni Jasper, nagturpos iti Medtech iti St. Louis College, Baguio City ken Fine Arts iti University of the Philippines College of Baguio ngem agdama a freelance web designer ken ni Daisy Joy, nagturpos iti Medisina ken pediatrician ti Tricity Medical Hospital ken maysa pay nga ospital iti Pasig.

Maipagpannakkelko a kunaen a dakkel ti naitulong ti kinamannuratko iti panaglupos ti panagbiagmi.

Idi nagdennakami ken ni Rose (dati nga Allibang), nakapulpulosak agsipud ta nakaudko amin nga urnongko iti panangpasukatko iti daan a balaymi idi baroak pay.

Dandani makatawen idi a nagisuroak nga awan sueldok. Dakkel a panagsakripisio ken panagsalimetmet numona ta naipalladawak a nagisuro iti Quirino, nasulinek nga ili iti probinsiami.

Apaman a naawatko ti naurnong a sueldok, dagusko nga inggatang iti kayo, sim, tabla a pagdiding, semento ken landok iti siudad ti Dagupan. Nalaklaka ngamin dagiti tagilakoda iti Dagupan. No panakkelen a kantidad ti gatangem kadagiti hardware store sadiay, paitulod payen ti akinkukua dagiti gatangem iti mismo a pagpatakderam.

Babaen ti nadakamat a kantidad, naatepan ti naipatakder a balaymi, nadidingan ti maikadua a kadsaaran, ken addan rikep dagiti tawa. Nupay kasta, labus pay ti akimbaba a kadsaaran.

Kinapudnona, saandak a patien dagiti annakko idi inestoriak a nakurang laeng a P3,000 ti nagastok iti pannakaipatakder ti napuotanda a balaymi idi ngalay ti 1960s. Kasta met a dida patien nga idi simrekak iti serbisio, P212 laeng ti nangrugiak a sueldo. Ngem no idilig ita ti balor ti pisos idi ken ita, adayo nga ad-adu ti pakaigatangan ti sueldok idi ngem iti sueldo dagiti mangisursuro iti agdama.

Kalpasan ti panagkasarmi ken ni Rose, nagsubli a nangisuro iti Quirino. Ngem kalpasan ti makatawen, naiyalis iti Vigan Central School a pagisursuruak met laeng.

Nakiludonkami kada Nanang ken dagiti ikitko iti sumagmamano a tawen. Sakam la limmaksid nga agassawa kada Nanang idi addan tallo a tawen ni Jasper ken dua metten ni Daisy Joy. Sakbay dayta, rinugianmi a pinatakder ti maysa a bungalow iti daga a tawidko iti daydi tatang. Inut-inot ti pannakaipatakder ti balaymi gapu iti kinakisang ti igatang kadagiti maikapet.

Ngem kadagidi a panawen a kareggetko ti agsurat iti sarita iti Bannawag. Agsasaruno dagiti saritak a maipablaak. Adda pay daydi nagsaruno a dua a tawen a siak ti napili ti Bannawag a Most Valuable Contributor gapu iti kaadu dagiti saritak a naipablaak. Kas gunggonak, pinadayawannak ti Liwayway Publications bayat ti Christmas partyda iti opisinada ket naikkannak iti P1,000 a gunggona. Nakaanay dayta a kantidad nga inggatangko iti jalousy ti bukilad a tawa iti baba.

Idi rinugian ti Bannawag ti nagpasalip iti sarita manipud idi 1961, saannak a nagpabatubat a nakisalip. Naburnok dagiti mannurat a nakisalip ta malaksid a dakkel ti premio, dakkel a pammadayaw ti maitedna iti mangabak a mannurat agsipud ta maibilang ti Bannawag a Biblia iti Amianan.

Iti panaglabas dagiti tawen, adda pay dagiti sabali a nangesponsor iti pasalip iti sarita. Madakamat ditoy ti Economy Tours and Travels, Golden Leaf Literary Awards, ti GRAAFIL, Gumil-Hawaii, Gumil-California ken dadduma pay a pasalip.

Kadagidi immuna a tawen a pasalip ti Bannawag, maysaak metten kadagiti nagab-abak ngem iti minor prize laeng. Ngem kaniak a biang, dakkelen a dayawko ti pannakapili dagiti saritak a maysa kadagiti minor prize agsipud ta kadagidi immuna a tawen ti pasalip, umabot pay iti nasurok a 150 dagiti mannurat a nakisalip, saan a kas ita a apagsurok laeng a duapulo dagiti maisalsalip a sarita.

Idi a panawen, P1,000 laeng ti umuna a gunggona, P750 ti maikadua ken P500 ti maikatlo. Ngem kadakami a mannurat, dakkelen dayta a premio, malaksid laeng ti pammadayaw a kaapiring ti pannakapili ti saritami a kapintasan.

No mangabakak, aramatek ti premiok para iti aniaman a material a maikapet iti ipatpatakdermi a balay. In-inut a nagbukel ti binangonko a balay.

Paragpag pay laeng no ar-arigen ti balaymi idi imbagak ken ni Rose nga umakarkamin. Nadlawko nga agpangadua pay ni baket nga umakarkami agsipud ta malaksid nga awan pay ti ania nga alikamenmi, awan pay idi ti rikep dagiti tawa. Gimmatangak idi iti plywood ket daytoy ti itakkabmi iti tawa iti rabii.

Kasla masirsirmatak pay laeng agingga ita ti buya iti uneg ti “dandanekan” a balay (dayta ti panangiladawan ti Inang ni Rose iti balaymi idi immayna binisita dagiti appona). Agkakaatagkami a sangapamilia iti maymaysa a pagiddaan a naaramid iti kayo ken naaplagan iti sangabukel a plywood. Impakuros ti panagiddami tapno makaanaykami iti katre.

Maysa pay a problema ni Rose no asino ti mangkita kadagiti ubbing no mapankami agisuro, saan a kas iti balaymi iti daya nga adda da nanang ken anti a mangaywan kadagiti ubbing.

Pagsayaatanna ta nalaka pay laeng idi ti mangala iti kaduami manipud iti Quirino. Nagpaarayat ni Rose ken ni Inangna ket pinaipababana ni Mercedes a kaduami iti balay.

Naragsak nga ubing ni Mercedes. Maysa a diak pakalipatan kenkuana ti kinatinggaw ti garikgikna. Malapunos ti uneg ti balay iti natinggaw a garikrikna. Ita, daydi nalaing a gumarikgik nga ubing, nasayaaten ti biagda ken ti pamiliana iti Australia a pagnaedanda iti agdama.

Kinapudnona, nasdaaw da Nanang no apay nga agreggetak nga umakarkamin uray saan pay a nakasagana ti balaymi. Dakkel a gin-awami ti kaaddada a mangaywan kadagiti annakmi no mapankami ken ni baket agisuro. Uray pagbiag, dakkel a pakainutanmi agsipud ta adda met masapulanda iti panaglakoda iti ikan iti tiendaan. Dagiti pay ketdi naimas a sidaen ti ilasinda a para kadakami.

Ngem dakami laeng ken ni Rose ti makaammo iti naun-uneg a gapu no apay a kayatmin ti umakar. Kayatko ngamin nga agwaywayaskamin ta dumakdakkelen dagiti annakmi. Kayatko a rugianmin a bangonen ti pagtaenganmi a bukodmi, a saankami nga agpampannuray lattan kada Nanang ken dagiti ikitmi. Kangrunaanna, kayatko a padakkelen ken patanorenmi dagiti annakmi iti kabukbukodanmi a wagas.#

No comments yet.

Leave a Reply