Footer

BANNER: Tropa ti gobierno, pinaputokan LCTs bayat combat operation

SALCEDO, Ilocos Sur – Mapapati a maymaysa a grupo ti local communist terrorists ti nakaranget dagiti tropa ti gobierno sadiay Barangay Calangcuasan ditoy nga ili idi agarup 11:40 ti bigat ti Disiembre 4.

Iti report manipud iti police station ti Salcedo, nakaengkuentro ti 81st IB ti grupo dagiti armado a tattao a mapapati a miembro ti Platun SIS Sandino ket napasamak ti ranget iti nagbaetanda.

Apagbiit laeng ti panagpinnaltog dagiti soldado ken dua a terorista agsipud ta dagus a nagatras dagitoy ket naglibasda iti laud a direksion.

Kanaig daytoy, dagus a nangipasdek iti checkpoint dagiti polis-Salcedo ken ti 2nd Manueuver Platoon, ISPPSC nga indauluan ni Police Inspector Joseph Bantullay.

Iti inisial a report, madama ti panangiwayat dagiti soldado iti pursuit operation maikontra kadagiti grupo ti armado a tattao a nangpaputok kadagiti tropa ti gobierno sadiay Barangay Balidbid idi agarup 8:40 ti agsapa iti dayta met laeng a petsa.

Naammuan a nagiwayat iti combat operation iti kabakiran a paset ti nadakamat a barangay ti maysa a platoon ti 81st IB nga indauluan ni 2nd Let. Niel P. Lagana agraman ti 2 a personnel ti Mortar Company nga indauluan ni Cpl Jaimelito C. Ambasa idi napaputokanda.

Mapapati a daytoy met laeng a grupo ti nakaranget dagiti soldado iti Barangay Balingcuasan.

Itay nabiit, kinansela ni Presidente Rodrigo Duterte ti maiwaywayat a peace talks iti nagbaetan ti gobierno ti CPP-NPA-NDF gapu iti agtultuloy a panagatake dagiti lokal a komunista a terorista kadagiti soldado. (Tawid News)