Footer

Pannakapapatay retirado a maestro, awan pay suspetsa

STA. LUCIA, Ilocos Sur – Naguray ti suspek iti waig iti asideg ti nagpikuran ket idi limmabas ti traysikel a nagluganan ti biktima, imbanagnan ti dakes a panggepna a nakatayan ti biktima.

Daytoy ti inisial a resulta ti panagimbestiga dagiti polis mainaig iti pammaltog a nakagudasan ni Felix Bernales y Tudayan, 70, married, retired teacher iti USA ken residente iti Barangay Nagtablaan, Sta. Lucia, Ilocos Sur idi malem ti Disiembre 1.

Iti pannakaisurat daytoy, awan pay ti suspek iti pammapatay.

Iti palawag ni Florendo Valdez y Pascua, 60, part time a trabahador ti biktima, agdaldaliasat ti traysikel a minanehona iti provincial road a sakup ti Barangay Namatican ditoy met laeng nga ili, ket iti nagpikuran iti asideg ti waig, napaltogan ti biktima manipud iti likudan.

Pinakaskas ni Valdez ti traysikel ket nagpaarayat iti residensia ti biktima.

Intaray ni Benjie Bernales babaen met laeng ti nasao a traysikel ni Bernales ngem naideklara a natay daytoyen.

Base iti report ti doktor, nagsagrap ti biktima iti 5 a gunshot wounds iti likud ken 2 iti kannawan a takiagna.

Agtultuloy ti panagimbestiga dagiti polis mainaig iti nasao a pammapatay.#