Footer

Sinursuran: Ti Kinapropesional

Kolum ni Jobert M. Pacnis

(Maudi a paset)

Saan pay a mailinged nga addada met mangmolmolestia kadagiti adalanna. Nagalas a damag ngem simumulagat a kinapudno. Mapaspasamak pay uray kadagiti ubbing iti elementaria.

Sadino ti ‘yan ti kinapropesional kadayta a banag? Uray ania nga anggulo ti pangsiripan, saan a maikanatad ti kastoy.

No pay makita ni mannursuro nga umin-inum iti nasanger wenno agsigarilio, sabali ti pagkitkitaan ti tao kenkuana. Saan a propesional!

Ngem no sabsabali a titulado, kasla awan laeng. Maysa pay a bangkirig a panangkita iti kinatao.

Dagita ti kanayon a pangibagaan ti tao a saan a propesional ni mannursuro.

Ngem ti kinapudnona, addada dagiti banag a saanda a makitkita.

Pagarigan, ti kanayon a pannakaladaw ni mannursuro a sumrek iti klasena. Uray ibaga payen a lima minuto laeng. Kadawyan a mapaspasamak aglalo no panagsisinnukat iti period. Adu pay laeng ti pakaisagudanna sakbay a sumrek iti sumaruno a klasena (CP, tsismis, panagpapintas, kdpy.).

Panagtakaw iti oras daytan! Maysa a basol.

Yanna nga adat, manmano, no adda man, dagiti maipapaayan iti pannusa.

Iti pannakakompiut dagiti grado, masuot met ti kinapropesional ni mannursuro. Saan laeng nga iti laingna nga agkompiut. Ketdi, adda kadi hustisia iti panangkompiutna kadagiti grado dagiti ubbing?

Masaludsod pay, saan kadi a nagbaliwbaliw iti intedna iti ubing? Idi nagpaeksam, awan kadi ti nangipakaammuanna kadagiti sungbat?

Saan a panangibaba kadagiti mannursuro, ngem addada dagiti mangiduolen kadagiti ubbingda dagiti ipaeksamda. Saan laeng a maiparebiu. Maited payen dagiti sungbat no dadduma.

Apay a kasta?

Iti kaadu ti papel a sangsanguen ni mannursuro, saanen a kayat pay ti dadduma nga agrigat a mangipasa kadagiti ubbingna.

Kangrunaanna la unay, kayatna a nangato ti rating dagiti ubbingna tunggal grading period. Iti kasta, nangato met ti rating-na a kas mannursuro nga ilanadna iti papel nga isumitena kalpasan ti school year.

Maysa pay, adda dayta pammilin iti ngato a mass promotion. Masapul a maipasa dagiti ubbing iti ngudo ti klase.

Uray nasakit iti nakem ni mannursuro, aramidenna ti kasta tapno saan a madaksan wenno maireklamo.

Ken kayatna ngarud nga isunto laeng ti agpa-remedial classes inton bakasion? Ipaayna laengen iti pamiliana.

Isu nga ipasana lattan dagiti ubbing tapno awanen ti pampanunotenna.

Ket daytoy a pagalagadan ti mapalpaliiw a pagdakkelan ti ulo dagiti ubbing. Paglastogda a makapasadanto latta uray agkaralangan wenno ag-cutting classes-da.

Nasakit a banag daytoy kadagiti mannursuro ta marabrabngis ti kinapropesionalda. Ngem ania ngarud ti maaramidanda?

Kinapropesional.

Kadagiti programa ti ili, masmasnop latta met dagiti dumardar-ay a mannursuro no dadduma. Saanda nga ikankano ti akemda iti sosiedad.

Aglalo la ngaruden kadagiti asideg iti head-da. Pagpannurayda a saandanto met laeng a maungtan wenno maikkan iti memo. Alaenda dayta a gundaway a nayonan ti bakasionda.

Kinapropesional. No akem, akem koma latta. Saan nga agbalin a napangato, natangsit ken di mangipirpirit.

Iti met sosiedad, saan la koma a maipannurok kadagiti mannursuro ti panangpaliiw iti kinapropesional.

Saantayo man a nakaadal, no agbalintayo a napudpudno nga umili wenno makipagili, mabalin a kunaen nga imettayo ti napaypayso a kinapropesional.

Ita a panawen manen ti pannakarambak ti kasangay ti Anak Ti Tao, a kunada a panawen ti ayat, apay a ditayo ipa-Paskua ti kinapropesionaltayo iti amin nga aspeto ti panagbiag?

Mamatiak, propesionaltayo amin. Adda laeng iti panangaramat, panangipamatmattayo kadaytoy. Saan a masapul a nakapasatayo iti ania man a licensure wenno board exam.#

Comments are closed.