Footer

BANNER: Estudiante, dinungparna poste ti elektrisidad, DOA iti ospital

SAN JUAN, Ilocos Sur – Mapapati nga adda iti inpluensia ti arak ti maysa nga estudiante idi dinungparna ti poste ti elektrisidad iti igid ti kalsada sadiay Barangay Immayos Norte, ditoy nga ili idi parbangon ti Disiembre 3.

Saanen a naidanon a sibibiag pay ni Rosario Valer y Ventura, 18, awanan asawa, college student iti Pira Hospital, Cabugao gapu iti sinagrapna a grabe a dunor iti ulona.

Nagsagrap met kadagiti garumiad iti nadumaduma a paset ti bagina ti back rider a ni Christian Jay Nigos y Giron, 19, awanan asawa, ken trabahador.

Kas maibatay iti report, agtartaray nga agpadaya iti provincial road ti TMX 125 a minaneho ni Valer ket idi makadanon iti nagpikuran iti Barangay Immayos, napukaw ti biktima ti kontrolna iti manibela, ket direkta a dinungpar ti lugan ti poste ti elektrisidad a puon ti nakatayanna.

Nakaro a nadadael ti sungo ti motorsiklo gapu iti impact ti pannakaidungparna.

Kabayatanna, maysa a traysikel ken motorsiklo ti nainbolbar iti aksidente sadiay Barangay Immayos Norte idi sardam ti Disiembre 2 a nakadundunoran dagiti biktima a pakairamanan ti maysa a menor de edad.

Iti report manipud iti polis ti San Juan, sinapgid ti motorsiklo a minaneho ni Robert Arsitio y Jamon, 42, naasawaan, musician, ken residente iti Barangay Solid West, Vigan City ti TMX tricycle a minaneho ni Angelo Miko Vite y Pichay, 13, Grade 7, ken residente iti Barangay Immayos Norte, San Juan a puon ti nakadunoranda agraman ti back rider ti motorsiklo a ni Christian Paul Arsitio, 21.

Kas rimmuar iti inisial nga inbestigasion, sarsarunuen ti motorsiklo ti traysikel agpa-abagatan iti dayta nga oras ket iti nakapasamakan ti aksidente, obertekan koma ni Arsitio ti sarsarunuenna a traysikel ngem mapapati a dina nakita ti signal daytoy nga agpakannigid a puon ti nakasapgidanna iti traysikel.

Kas resulta, naitaray dagiti tallo a biktima iti Gabriela Silang Hospital, Vigan City gapu ta natukkol ti makannawan a saka ni Arsitio, nagaradgadan ti nadumaduma a paset ti bagi ti insakayna ken nadunor met ti ulo ti menor de edad. (Tawid News)

Comments are closed.