Footer

EDITORIAL: Naatap ti Kappia iti Nagbaetan ti Gobierno ken Komunista

NAKASAYSAYANG ti napalusposan manen a gundaway tapno maisardeng koman ti aglima dekadan a nadara a ranget iti nagbaetan dagiti tropa ti gobierno ken dagiti rebelde a komunista ta imbilinen ni Presidente Rodrigo Duterte a maisardengen ti peace talk gapu ti agtultuloy a panagambus ken panagatake dagiti rebelde kadagit polis ken soldado, ken panagisayangkatda iti extortion kadagiti negosiante ken pribado a tattao.

Narurod ni Duterte iti panagatake dagiti rebelde kadagiti tropa ti gobierno kabayatan ti ceasefire ken peacetalk nangruna ti pannakaambus dagiti kameng ti Presidential Security Gruop sadiay Arakan, North Cotabato kabayatan ti panag-turongda koma sadiay Cagayan de Oro City kas advance party iti ibibisita sadiay ti Presidente idi Hulio 19, 2017. Natay iti ambus ti maysa a kameng ti CAFGU ken nasugatan dagiti innem a kameng ti PSG. Nakapungtot ti Presidente gapu ta ti PSG dagiti mangipapaay iti seguridadna ken ti pamiliana ket ibilangna dayta a panagtambang a gandat iti biagna.

Nagibbet ti Presidente kadagiti natadem a sarita iti Founding Chairman ti Communist Party of the Philippines a ni Jose Maria Sison a no napudno isuna a rebolusonario ket agawid iti Pilipinas tapno ditoy pagilian a makiranget, saan ketdi nga agindeg iti ballasiw-taaw kabayatan a makidangdangadang dagiti pasurotna ken dagiti mamati ken makisimpatia kenkuana.

Nabayagen a nawara ken nagsisina dagiti pagilian a namunganayan ti komunismo. Narpuogen ti Union Socialist Soviet Republic a sigud a nakaikappengan ti Russia ken dagiti komunista a pagilian a kaaliadona sadiay Europa ken pasetna iti Asia.

Ditoy Asia, malaksid iti North Korea nga agtaltalinaed a tradisional a komunista ti sistema ti gobierno, dagiti pagilian a China, ken Vietnam ket saanen a naan-anay a socialista a sistema ti wagas ti gannuat ti gobiernoda ta in-inut nga inlukatda dagiti ruangan dagiti pagilianda iti intero a lubong kadagiti foreign investors tapno agdur-as ti negosio ken ekonomiada.

Iti laksid a napabilangen dagiti makanigid a sektor iti salisal iti politika ta adun dagiti leftists a nagbalin a kongresista babaen ti partylist systems ket naikkanda ti gundaway nga aktibo a makipaset iti pannakaputar dagiti linteg ti pagilian, ket adu latta dagiti saan a mangabrasa iti naindemokrasiaan a sistema. Nagrigat a maawatan ti pammati ken pagtaktakderan dagiti maibilang kadagiti makanigid a grupo ta adu latta dagiti mangpili ti nadara a pannakibaka babaen ti panagusar ti armas. Aktibo pay laeng ti komunismo nga ideolohia iti Pilipinas, ken agtultuloy met ti pannakiranget dagiti rebelde kadagiti puersa ti gobierno.

Nagadun dagiti nakettel a biag iti las-ud ti 48 a tawen a panagrangranget dagiti tropa ti gobierno ken dagiti rebelde a komunista. Adun a pamilia dagiti napukawan ti ipatpategda iti biag gapu iti awan ti mamaayna a gubat. Iti panag-raranget dagiti tropa ti gobierno ken dagiti kameng ti New People’s Army, agpadpadada a maabak ta agpimpinnatay dagiti agkakadara a Pilipino.

Nakasaysayang ti gundaway a matuntonan ti mataginayon a kappia iti administrasion ni Duterte ta adu dagiti inwayatna tapno magun-odna ti talek dagiti komunista. Nangdutok iti tallo a kameng ti gabinetena a nominado dagiti makanigid a grupo. Iti rugi ti administrasion, positibo isuna a mallukoyna dagiti rebelde a komunista nga isukodan dagiti armasda ket aktibo a makipasetda iti naindemokrasiaan a sistema ti gobierno gapu ta nagbalin a propesor ti Presidente idi agbasbasa pay laeng iti kolehio ni Sison a mabigbig a lider ti CPP.

Ngem kalpasan ti makatawen, nagbaliw ti panagkita ti Presidente iti sigud a propesorna. Kinastigona ti lider dagiti komunista kabayatan ti maikadua a panagipaayna iti State of the Nation Address. Nagsarita pay ti Presidente iti entablado dagiti agral-rally iti ruar ti Batasan Pambansa kalpasan ti SONA. Kadagiti simmarasarunon a panagsa-ritana iti publiko, binabalawna dagiti rebelde nga agam-ambus ken agkikkikil wenno agisay-sayangkat ti extortion nga agpamparangda nga agkolkolekta iti revolutionary tax.

Naglibakan met ni Sison dagiti alegasion ti Presidente. Impettengna a brasbrasuen ni Duterte dagiti lider ti CPP – NDF. Inakusaran met dagiti lider ti makanigid a grupo a saan a natungpal ni Duterte dagiti adu a karina sapasap a pagimbagan nangruna para kadagiti mangmangged, taga-away, maikuskuspil ken marigrigat.

Iti laksid ti panangpasardengen ti Presidente iti peace talk ken panangibilinna a maareston dagiti NDF consultants, mangnamnama dagiti government negotiators da Labor and Employment Secretary Silvestre Bello III, ken Presidential Adviser for Peace Process Jesus Dureza ken dagiti dadduma pay a lider ti CPP ken National Demoratic Front nga agsublinto met laeng iti peace talk iti nagbaetan ti gobierno ken dagiti rebelde.

Maanninawan ti napudno a tarigagay ti Presidente a makikappia koman kadagiti rebelde a komunista nangruna iti daytoy a panawen nga agrurutap dagiti parikut ti gobierno iti pakaseknan ti urnos ken kappia iti pagilian – ti krisis sadiay Marawi City gapu kadagiti terorista a miembro ti Maute Gruop a mangid-idolo iti Islamic State of Iraq and Sysria, ti agtultuloy a terorismo nga isaysayangkat dagiti kameng ti Abu Sayyaf Gruop ken Bangsamoro Islamic Freedom Fighters ken ti pangta dagiti kameng ti Moro Islamic Liberation Front ken Moro National Liberation Front ken ti pangta ti agtultuloy a panangsakup ti China iti teritorio ti Pilipinas iti West Philippines Sea.

Inawisna pay ti Presidente dagiti NPA a makitinnulong tapno mapaksiat dagiti terorista a nangsakup iti Marawi City, ngem imbes a timmulongda, ginundawayanda ketdi ti adu a pakakumikoman dagiti kameng ti Armed Forces of the Philippines ken Philippine National Police tapno makaisayangkatda kadagiti bukodda nga operasion kontra iti gobierno.

Kadagitoy a panawen a kasapulan unay ti panagkaykaysa ken panagsisinnakit dagiti Pilipino a manglaban ti pangta ti kinaranggas, terorismo ken panagsakup dagiti ganggannaet kadagiti teritorio ti pagilian. Ngem agtultuloy met latta dagiti ranget iti baet dagiti puersa ti gobierno ken rebelde a komunista.

Nasiit ti dalan nga agturong iti mataginayon a kappia. Ngem nasken a masurotan daytoy tapno sumardengen ti pannakaibuis dagiti adu a biag. Ngem agingga nga adda dagiti Pilipino nga addaan kadagiti nalimed ken managimbubukod nga interes ket agtalinaed a naatapto latta ti naan-anay a kappia iti baet ti gobierno ken dagiti rebelde a komunista kabayatan ti agdama nga administrasion.#

Comments are closed.